Маңғыстау облысындағы «Қазавтожол» ұлттық компаниясы филиалының бұрынғы басшысы мен оның орынбасары сотталды, – деп жазады 24.kz.
Пара алып және бюджет қаржысын жымқырған екеу енді 6 жыл түрмеде отырады.
Айыпталушылар жазасын қауіпсіздігі төмен түзеу мекемесінде өтейді.
Экс-директор өткен жылдың маусым айында, ал орынбасары одан бір ай бұрын ірі көлемде пара алу дерегімен ұсталған болатын.
Оларға республикалық маңыздағы «Бейнеу-Ақжігіт-Өзбекстан шекарасы» көлік жолын салуға бөлінген мемлекет қаражатын талан-таражға салды деген айып тағылған.
Қалалық соттың судьясы Марет Ковраева: «Қылмыстық құқық бұзушылықтардың жиынтығына сәйкес, айыпталушылардың әрқайсысын 6 жылға бас бостандығынан айыруға шешім қабылданды.
Олардың мемлекеттік қызметке баруына өмірбойы тыйым салынады. Айыпталушыларды қамауға алу мерзімі сот үкімі оқылған сәттен басталады. Сондай-ақ филиалдың көлік жүргізушісінің бостандығы бір жылға шектелді», – деді.
