Қырғыз елінің Ыстықкөл облысында қазақстандық туристер мінген көлік қар құрсауында қалып қойды, – деп хабарлайды Aikyn.kz.
Сол елдің Төтенше жағдайлар министрлігі жазғандай, құтқарушылар Қазақстан азаматтарын қар көшкінінен құтқарып қалған.
«Мәліметтерге сәйкес, көліктегі 5 адамнан тұратын отбасы мүшелері Қазақстанның азаматтары болып шықты. Олар Қаракөл тау шаңғысы курортына демалуға келген», – деп жазды ведомстводан.
Қырғыз Республикасы ТЖМ Тау-құтқару жұмыстары қызметінің 7-жеке мобильді тау-кен-құтқару взводының 4 құтқарушысы, сондай-ақ Ақ-Суу аудандық бөлімінен 2 құтқарушысы шұғыл түрде оқиға орнына барған. Олар құтқару көлігінің көмегімен тұрып қалған көлікті шығарып алған.
Қазір туристердің жағдайы қалыпты. Олар ауа райы жақсарғанша Қаракөлде болады.