Айтулы мереке аясында профессор есімімен дәрісхана ашылды. Іс-шараға ҚР ҰҒА академиктері мен тілші-профессорлар қатысып баяндама жасады.
Нұржамал Оралбайқызы – сәулелі ғұмырын қазақ тіл біліміне арнаған тұлға. Филология ғылымдарының докторы, профессор көзі тірісінде 300-ден астам ғылыми мақала, 20-дан астам оқулық пен монографиялық еңбек жазып қалдырды. Одан өзге 70-тен астам ғылым докторы мен ғылым кандидатын даярлап, қазақ ғылымына өлшеусіз еңбек сіңірді. Кезінде университет жанынан ашылған докторлық диссертация кеңесінің төрайымы қызметін абыроймен атқарғанын әріптестері мақтанышпен еске алады.
Нұржамал Оралбайқызының ғылымдағы айрықша жаңалығы – қазақ тілінің сөзжасам жүйесін тереңінен зерделеуі еді. Дәл осы тақырып аясында ғалымың жетекшілігімен ғылыми-зерттеу жұмыстары жазылды. Бүгінге дейін жеткен «Қазіргі қазақ тілінің морфологиясы», «Қазіргі қазақ тіліндегі сан есімнің сөзжасам жүйесі», «Қазіргі қазақ тіліндегі етістіктің аналитикалық форманттары» және т.б іргелі мұралары бар. Нұржамал Оралбайқызы осынау тың еңбектері мен ғылым кадрларын даярлаудағы сүбелі үлесінің арқасында тіл ғылымының мектебін қалыптастыра білді.
Алтынай БАУЫРЖАНҚЫЗЫ,
Алматы қаласы
фото: almaty.tv