Мәжіліс депутаты Шалқар қаласындағы Белсенді өмір сүру орталығында болып, ауданда әртүрлі салада қызмет атқарған зейнеткерлермен кездесті. Кездесу барысында ақсақалдар «Шалқар – Ақтөбе» автомобиль жолының құрылысын жақын уақытта аяқтап, пайдалануға берілуіне ықпал жасауды сұрады.
Қазыбек Әлішев бұдан кейін Шалқар аграрлық-техникалық колледжінің ұжымымен және колледж студенттерімен кездесті. Колледждің директоры Жадыра Жұқатаеваның айтуынша, қазір оқу орнында 8 мамандық бойынша кадр дайындалады екен. Колледж түлектеріне сұраныс жоғары, әсіресе теміржол саласына жұмысқа орналасқан түлектердің үлесі басым болып отыр. Кездесу барысында колледждің 3-курс студенті Айзат Бекболатова жастарға арналған, оның ішінде өз кәсібін жаңадан бастаған кәсіпкерлерге берілетін қайтарымсыз гранттар саны көбейтілсе деген ұсынысын білдірді. Қазыбек Әлішев қазір барлық сала бойынша жастарға арналған қайтарымсыз гранттарға тоқталып, кез келген азаматтың кәсібін кеңейтуі үшін «Ауыл Аманаты» жобасына қатысуы маңызы ерекше екенін атап өтті.
Оқу орынындағы кездесуден соң Мәжілісмен партияның аудандық филиалы ғимаратында жергілікті халықты қабылдады. Депутаттың қабылдауында болған тұрғындар халқы 1 000 адамға жетпейтін ауылдарда медициналық пунктер мен ауылдық клубтар салынуын, автокөліктердің салығына өзгеріс енгізуді, «Шалқар – Бозой – Бейнеу» автомобиль жолында ауыр жүк көліктерінің қозғалысын шектеуді сұрады.
Одан бөлек, аудандық мәслихат депутаттарының қатысуымен болған келелі отырыста ауылшаруашылық саласына қатысты бірқатар мәселе талқыланды.
Бердібек ҚАБАЙ