Журналистің мәліметінше, Оңтүстік Африка Республикасындағы ҚР Елшілігінде консулдық есепте 31 қазақстандық жетім бала тіркелген, - деп хабарлайды Aikyn.kz.
Бірақ балалар кәмелеттік жасқа толып кеткендіктен, консулдық есептен шығарылған.
"Олар енді ОАР азаматтары. Қазіргі уақытта консулдық есепте қазақстандық бір бала бар, оның жасы 16-да. Асырап алғанда жүрегінде ақау болған, емдеткен, қазір жағдайы жақсы. Қалған балалар да дін-аман. Өлмеген, ТІРІ! Органға кетпеген! ОАР-ның түрлі қаласында тұрып жатыр. Оларды ақ нәсілділер асырап алған, көпшілігі еврей. Тұрмыстары жақсы, арасында дипломаттар да бар. Қазақстандық жетім балаларды асырап алғандардың ішінде қытайлар да бар", - деп жазды Жанар Байсеміз.
Тілшінің жазбасында Оңтүстік Африка Республикасындағы 31 баланың құжаты 2014 жылы Египеттегі ҚР Елшілігінен ОАР берілгені айтылған. Өйткені бұл уақытқа дейін ОАР-да Қазақстан өкілдігі болмаған.
"Осы 31 баланың үшеуі Кенияда. ОАР-дағы ҚР Елшілігіне 14 мемлекет қарайды, бірақ Кения жоқ. Кениядағы қазақстандық үш баланы Дания, Нидерланд елдерінің азаматтары асырап алған. Олар да дін аман. Найроби қаласында тұрады. Жалпы, Оңтүстік Африка Республикасы - Африкадағы ең дамыған ел (интернеттен оқып алыңыздар). ОАР-дағы 30 шақты баланың 11-і қазақ», - деп жазды журналист.
Сондай-ақ ол журналистер жалған ақпарат бермей, нақты мәлімет тарату қажеттігін алға тартты.
«БАҚ өкілдері ойына келгенді айта бермеу керек. Дәлел, фактпен сөйлеу керек. ОАР қазақстандық жетім балаларға қатысты тараған жалған ақпарат ел ішінде дүрбелең туғызып жатқан соң, өз парақшам арқылы осы мәліметтерді жариялап отырмын. Еліміздің Сыртқы істер министрлігі, оның ішінде елшіліктер, дипломаттар өздеріне жүктелген міндетті дұрыс атқарып жатыр», - деп жазды Жанар Байсеміз.