Өскемен қаласының іргесіндегі «Коммунальник» және «Озеленитель» саяжайларында тұратын балалар мектепке жете алмай, машақат көріп келген еді. Олар аялдамаға жету үшін қараңғыда орман арасымен екі шақырым жол жүруге мәжбүр болды. Жергілікті тұрғындардың айтуынша, бүлдіршіндерге зорлық-зомбылық жасаған адамдар да, қауіп төндірген қаңғыбас жануарлар да болыпты. Тұрғындар саяжайдан облыс орталығына қатынайтын автобусты іске қосу қажет екенін айтып, Өскемен қаласының әкімдігіне және өңірлік білім басқармасына бір емес, бірнеше рет жүгінген көрінеді. Алайда одан еш нәтиже шықпаған. Мәселені «AMANAT» партиясының Шығыс Қазақстан облыстық филиалы шешіп берді.
«AMANAT»-қа жүгініп едік, мәселеміз оңынан шешілді. Қол ұшын созып, көмек көрсетті. Енді балаларға арналған арнайы автобус бар. Бүлдіршіндеріміз мектепке қауіп-қатерсіз жетеді. Бұған дейін балалар жаяу жүретін еді. Жол бойында оларға күш көрсеткен, әлімжеттік жасаған оқиғалар да болды. Тіпті, баламызды мектепке жіберуден қорқатын едік. Енді бұлай алаңдамаймыз», – деді жергілікті тұрғын Ольга Шахова.
«Біз мектеп директорынан да, әкімдіктен де көмек сұрадық. Алайда ешкім ештеңе істеген жоқ. Тек «AMANAT» партиясы ғана мәселемізге мән беріп, балаларға арналған автобусты іске қосуға ұйытқы болды», – деді жергілікті тұрғын Махаббат Ахмадиева.
Енді таңғы сағат 7-де оқушыларды сабаққа алып кетіп, түс мезгілінде үйге жеткізіп салады. Кешке сағат 19:40-та ата-аналар аялдамаға келіп, екінші ауысымда білім алатын оқушыларды күтіп алады.
«Біз аялдама орнатып, автобус бұрылатын алаңды тазарттық. Сондай-ақ балалар аялдамаға алаңсыз жетуі үшін көше шамдарын орнаттық. Жаяу жүргіншілер көпірі де қоса қамтылды. Мәселені шешуге облыстық мәслихат депутаттары, №18 мектеп басшылығы да атсалысты», – деді «AMANAT» партиясы Шығыс Қазақстан облыстық филиалы атқарушы хатшысының орынбасары Аманбай Нүркенов.
Берік БЕК