Кеңес отырысында өңірлердегі сыбайлас жемқорлыққа қарсы іс-қимыл жөніндегі әрекеттердің жай-күйі және партияның «Халықпен бірге!» сайлауалды бағдарламасын іске асыру барысында сыбайлас жемқорлық көріністерінің алдын алу, қоғамда резонанс тудырған проблемалық мәселелерді шешу жолдары жөніндегі сұрақтар да жан-жақты талқыланып, маңызды мәселелер тиісті құзырлы орындарға жеткізілді.
Айтар болсақ, жалпы 2021 жылдан бастап республикалық деңгейде барлығы 19 отырыс өткізілген. Осы уақыт аралығында кеңеске түрлі жағдайға байланысты барлығы 188 ұсыныс берілген.
Сонымен бірге осы 2021 жылдан бастап біршама проблемалық мәселе шешімін тауып, елдің талап-тілектері орындалғанын айтқан жөн болар. Мәселен, 2021 жылы Түркістан облысы Сайрам ауданы тұрғындарының өтініші бойынша аудандағы халық саны мен көрсетілетін қызметтердің ұлғаюын және халыққа қызмет көрсету орталығы қызметкерлерінің жүктемесін ескере отырып, аудан тұрғындарына қолайлы жағдай жасау, сондай-ақ мемлекеттік қызмет көрсету сапасын жақсарту мақсатында аталған ауданда халыққа қызмет көрсету орталығын ашу мәселесі кеңесте қарастырылды. Нәтижесінде, мемлекеттік корпорация тарапынан 65 штат санын 100-ге көбейту бойынша жұмыс жоспары жасалып, халыққа қызмет көрсету орталығы ашылды.
Ал Шығыс Қазақстан облысының Күршім ауданына қарасты Боран ауылы маңында ағатын Қалжыр өзенінің ластануы туралы мәселе ел арасында көтеріліп, Экология, геология және табиғи ресурстар министрлігіне тиісті шара қабылдау жөнінде хат жолданды. Министрлік тарапынан рейд жүргізіліп, Қалжыр өзені мен Шаңдыбұлақ бұлағының ластанғаны расталып, осы бойынша «С.А. Хван» ЖК әкімшілік жауапкершілікке тартылды. Су объектісінің одан әрі ластануына жол бермеу үшін жерді рекультивациялау жұмыстары тоқтатылды.
Батыс Қазақстан облысының Орал қаласына қарасты Круглозерное ауылында мемлекеттік-жекеменшік әріптестік жүйесі бойынша салынған, талаптарға сай келетін жабдықтары бар жаңа балабақша бар болатын. Ғимарат мемлекет меншігіне өткеннен кейін әкімдік жергілікті кәсіпкер салған қаржыны қайтаруы керек еді. Алайда жергілікті әкімдік бұл мәселені шешуге асықпаған. Кеңестің ықпалымен жергілікті бюджеттен қаражат бөлініп, балабақша мемлекет меншігіне толық өтіп, бүгінде онда 103 бала тәрбиеленуде.
Тағы да сол Батыс Қазақстан облысы Орал қаласының саяжай тұрғындары Шаған өзенінің жанындағы құрылысқа қарсы шықты. Ол құрылыс инвестициялық жоба болған екен. Алайда осы мәселені партия алаңында қарау барысында құрылыс компаниясы Каспий су қорғау инспекциясынан тиісті рұқсат алмағаны анықталды. Облыстық сыбайлас жемқорлыққа қарсы кеңес облыс прокуратурасымен бірлесіп атқарған жұмыстарының нәтижесінде Казталов ауданы Қособа елді мекенінде су каналын жауып қойған шаруа қожалығының жері иеліктен шығарылып, ауылдық резервке 100 гектар жайылым қайтарылды. Тағы бір маңыздысы, Павлодар қаласында аз қамтылған отбасыларға арналған көпқабатты үй құрылысы болып отыр. Құрылысы басталып, орта жолда тоқтап қалған ғимараттың мәселелерін анықтай келе бөлінген қаражаттың жетпеуі себеп болғаны белгілі болды. Жұмыстарды қайта қарап, құжаттары реттестіріліп, жобалық тізімге түзетулер енгізілді. Қазір 9 қабатты тұрғын үйдің құрылысы аяқталып, пайдалануға берілді. Сонымен қатар кеңес халықты сапалы сумен қамтамасыз ету мәселесіне де аса үлкен мән беріп келеді. Ауызсумен қамту мәселелерін қарастырып, облыстар мен қала әкімдеріне тиісті ұсынымдар беріліп, бірқатар мәселе өз шешімін тапты. Атап айтар болсам, Шымкентте ауызсу кесте арқылы сағаттап беріліп келген 9 елді мекен бар болатын. Қазір елді мекендерге сапалы ауызсумен қамтамасыз етілді. Ал қала маңындағы жаңадан салынған елді мекендер мен 7 тұрғын алап та сапалы ауызсумен қамтамасыз етілді. Ауызсу мәселесі Түркістан облысында да өзекті екені белгілі. Кеңес құрамы мен жұмыс істеу барысында Түркістан облысына қарасты 20 елді мекен жаңа ауызсу жүйесімен қамтамасыз етілді.
Одан бөлек, осы 2021 жылы ауылдардағы жайылым және шабындық жерлердің жетіспеушілігі бойынша проблемалық сұрақтар жиі көтеріліп, Ауыл шаруашылығы министрлігі мен әкімдіктерге ұсынымдар берілді. Кеңес отырысынан кейін ауыл шаруашылығы мақсатындағы пайдаланылмай жатқан жерлерді анықтау жұмысы бақылауға алынды. Кеңес қаулысын орындауда АШМ-мен бірлесіп Жол картасы әзірленді. Бұл шаралар пайдаланылмай жатқан ауыл шаруашылығы жерлерін мемлекетке қайтару жұмысына көмек болды.Осы мәселелер 2021 жылғы қорытындылардың бір парасы десек, 2022 жылы да кеңес біршама шаруаның шешімін тауып халық игілігін көріп отыр. Сол 2022 жылдың басында Жамбыл облысының Т.Рысқұлов ауданы Құлан ауылындағы «Арай» учаскесінде әлеуметтік тұрғын үй алуға кезекте тұрған азаматтарға арналған тұрғын үйлердің құрылысы аяқталғанымен, бір жылдан астам уақыт бойы ол үйлерге адамдар қоныстандырылмаған. Кеңес қаулысын орындауда 80 пәтерлі тұрғын үйге наурыз айынан бастап арнайы комиссия шешімімен кезекте тұрған тұрғындарға берілді. Сонымен бірге кеңестің жұмыс тобы Жамбыл облысында сайлауалды бағдарламасын орындауда жемқорлыққа жол берілмеуін қадағалау барысында проблемалық құрылыс объектілері анықталды. Партия тарапынан қабылданған шаралармен Т.Рысқұлов ауданы Қарақат ауылының №2 орта мектебінде күрделі жөндеу жұмыстары аяқталып, оқу процесі басталды. Қазір оқушылар кедергісіз білім алуда. Ал Солтүстік Қазақстан облысы Уәлиханов ауданының «Қулыкөл-Қаратал» ауыларалық жолын жөндеуге бөлінген қаражат ұтымсыз пайдаланылып, ауыл тұрғындарынан шағым түскен. Кеңес облыс әкімдігіне проблемалық мәселені шешу жөнінде ұсыным берді. Нәтижесінде, аудандық маңыздағы автожолдың шайылған учаскелері жөнделді. Одан бөлек, партияның сайлауалды бағдарламасын іске асыру бойынша Жол картасының сапалы орындалуын зерделеу барысында анықталған кемшіліктер жойылды. Мысалы, Петропавлдағы қызмет көрсету саласындағы мамандарды даярлау колледжіне 244 орындық жатақхананың құрылысына байланысты ши шыққан. Мердігер TOIR ЖШС-мен жалпы сомасы 755 млн теңгеден астам сомаға мемлекеттік сатып алу туралы шарт жасалған. Келісімшарт жасалғаннан кейін 226 млн теңгеден астам аванстық сома әлі жұмысқа кіріспеген мердігерге аударылып жіберген. Ал тексеру кезінде соманың 111 млн теңгесі ғана игерілгені анықталды. Кеңестің жұмыс тобымен мердігердің міндеттемесі орындалмай, жұмыс аяқсыз қалып, нысан іске қосылмағаны анықталды. Орындалмаған міндеттемелердің жалпы сомасы 456 млн теңге екен. Нәтижесінде, TOIR ЖШС-мен Петропавл қаласындағы қызмет көрсету саласы колледжінің құрылысына жасалған келісімшарт біржақты тәртіппен бұзылды. Партия тарапынан бақылау жұмыстары жүргізіліп, 2023 жылы жатақхана құрылысы аяқталды. Нысан қазір толық пайдалануға берілген. Мұндай келеңсіздіктердің басын тізіп айта берсек, жетерлік. Жыл сайын атқарылған және қолға алынып, жұмыс жүргізіліп жатқан шаруалардың да саны күн сайын артып отыр. Ал 2023 жылдың өзінде біршама келеңсіздіктің оң шешімі табылды. Солардың бір парасын жіпке тізе кетер болсам, мысалы Азаматтық авиация комитетіне тасымалдаушының кінәсінен рейстердің кешігу жағдайларын болдырмау, сондай-ақ ұшулардың жүйелілігін жақсарту жөнінде берілген ұсынымдар тасталып, жұмыс тобы шаруаны саралау барысында ұшулардың жүйелілігін арттыру үшін авиакомпаниялармен бірлесіп ұшақтар паркін толықтыру жоспары қабылданды. Рейстердің жүйелілігін жақсарту мақсатында халықаралық әуекөлігі ұйымының (ИКАО) ұсынылатын тәжірибесін және халықаралық әуекөлігі қауымдастығының (ИАТА) стандарттарын ескере отырып, «тарихи слотты» бөлу бөлігінде ел әуежайларында әуекемелеріне қызмет көрсету үшін уақыт аралықтарын бөлу қағидаларына түзетулер жобасы әзірленді. Түзетулер жобасы Әділет министрлігіне келісуге жіберіліп отыр. Осыған сай, комитет рейсті кешіктіру, тоқтату кезінде авиакомпаниялардың жолаушылар алдындағы жауапкершілігін күшейту жөнінде шаралар қабылдауда. Тасымалдаушылардың жауапкершілігін күшейту бөлігінде қолданыстағы заңнамаға түзетулер енгізілді. Одан бөлек, салада түрлі деңгейде 15 әкімшілік құқықбұзушылық анықталған. Сөйтіп, авиакомпаниялар жалпы сомасы 40 млн теңгеге республикалық бюджетке айыппұл төледі. Ал Бәсекелестікті қорғау және дамыту агенттігі прокуратура органдарымен бірлесіп жүргізген тексеріс нәтижесінде Air Astana авиакомпаниясы Алматы қалалық Әкімшілік құқықбұзушылық жөніндегі мамандандырылған ауданаралық сотының шешімімен жолаушылардан отын алымын негізсіз қолданғаны үшін үстем монополиялық жағдайды теріс пайдаланғаны үшін 876 млн теңгеден астам сомаға әкімшілік жауапкершілікке тартылды. Шымкент қаласының әуежай маңындағы салынған тұрғын үйлердің мәселесі республикалық деңгейде бірнеше рет көтерілгенін ел біледі. Анықталғандай, бұл аймақтағы 307 жер теліміне құрылыс жүргізілген. Аталған мәселені шешу үшін телімін мемлекет мұқтажына қайтарып алу жөнінде қаулы қабылданған болатын. Алайда бағалау жұмысы бұл мақсатқа 30 млрд теңге жұмсалып, мемлекет мұқтажына қайтарып алудың қала бюджетіне салмақ түсіретінін көрсетті. Нәтижесінде, Шымкент әуежайына санитарлық қауіпсіздікті қамтамасыз ететін қашықтықтан жаңа ұшу-қону жолағын салу жөнінде шешім қабылданды. Осыған орай жобалық-сметалық құжаттарды әзірлеу үшін Qazaq City Stroy ЖШС-мен меморандум түзілді. Жаңа ұшу-қону жолағының ұзындығы 3 300 метр, ені 45 метр болады. Халықтың баспанасы бұзылмай, мемлекет қаржысы да үнемделіп, әуежайда заманауи ұшып-қону жолағы салынады. Сонымен бірге проблемалы 307 жер телімі иелерінде қалдырылды.
Әуекөліктерімен әуежайларға қатысты өзге де өзекті мәселелердің беті ашылып, түзетулер жүргізілу үстінде. Мәні анықталған мәселе ел ішіндегі рейстер мен ел аумағынан тысқары шығатын рейстерге де қатысты болып отыр.
Осы 2023 жылы Атырау облысында партияның сайлауалды бағдарламасын сапалы орындау және жемқорлықтың алдын алу бойынша, құрылыс жұмыстары тоқтап тұрған нысандарға қатысты кеңес нақты ұсынымдар берді. Нәтижесінде, Исатай ауданы Қызыл үй ауылын газбен жабдықтау желісі салынып, 2023 жылы 29 қарашада жұмыс қабылданды. Жобаның жалпы құны – 716,2 млн теңге.
Сыбайлас жемқорлықты алдын алу, партияның сайлауалды бағдарламасын орындау жөніндегі жұмыстар тиісті деңгейде атқарылмағаны үшін кеңес ұсынымымен партиялық және тәртіптік жауапкершілікке тартылған біршама лауазымды тұлғаның аты-жөнін нақтылады. Бұл қатарда әр жыл бойынша сайын жеке-жеке тізім жиналды. Лауазымды тұлғалар қатарында облыстардың әкім орынбасарлары, аудан мен қала әкімдері, басқарма басшылары, білім саласының лауазымды тұлғалары да бар екенін айтқан абзал. Қазір анықталған лауазымды тұлғаларға қатысты тәртіптік шара қабылданды.
«AMANAT» партиясының жанындағы сыбайлас жемқорлыққа қарсы іс-қимыл жөніндегі республикалық кеңестің қызметі ел халқының тұрмысы мен тіршілігін оңалтып, жер-жерлерде болып жатқан заңсыздықтарға тосқауыл болу жұмыстарын бұдан әрі де жалғастыра беретіні анық. Бұл – Президентіміз Қасым-Жомарт Кемелұлының да, «AMANAT» партиясының да алға қойып отырған басты міндеті.