Биік ғимараттың өн бойына шиыршық (спираль) формасында бақ өсіру идеясының жаңа көрінісі туралы newatlas.com сайты жазды. Мақалаға сілтеме жасаған Aikyn.kz сәулет өнеріндегі осы тәсілдің соңғы жылдары неге жиі қолданыла бастағанын түсіндіреді.
Ғимарат жасыл бақтың ортасынан өсіп шыққандай. Иллюстрация newatlas.com сайтынан алынды. Авторлығы: Foster + Partners
Бұл жоба өзінің ерекше шиыршық формасымен Helter Skelter аттракционын еске түсіреді. Британияның ойын-сауық саябақтары мен жәрмеңкелерінде бұл аттракцион кең таралған, оны ағылшындар жақсы көреді. Ал Star Hollywood ғимараты Лос-Анджелестегі Sunset бульварында орналасады. Ол бастапқыда мүлдем басқа дизайнда жоспарланған болатын, бірақ кейіннен қала билігі жасыл бақ идеясын таңдаған.
Star Hollywood алғашында осындай формада жобаланған еді. Фото newatlas.com сайтынан алынды. Авторы: MIR
Star Голливуд мұнарасын Foster + Partners дизайнерлік сәулет компаниясы жобалаған. Норман Фостер басқаратын компания бұл ғимаратты болашақтың жұмыс орны ретінде қарап, Голливудтағы қызметкерлерге ауқымды кеңістікті қамтамасыз ететін шиыршық атқан бақтармен қоршаған.
88 жастағы Норман Фостер бүкіл әлем бойынша жүздеген жобалар жасаған. Оның қолтаңбасы Астананың ғимараттарында да бар. Дизайнердің эскиздері бойынша елорданың символына айналған бес ғимарат – «Бәйтерек» монументі, пирамида түрінде жасалған Бейбітшілік және келісім сарайы, Тұңғыш Президент кітапханасы, «Хан Шатыр» ойын-сауық орталығы және Орталық Азиядағы ең биік ғимарат Абу-Даби Плаза көпфункционалды кешені салынған. Енді Норман Фостер Голливудты таң қалдырмақшы.
Үйдің самалдығы өзінше эмоция туғызады. Иллюстрация newatlas.com сайтынан алынды. Авторлығы: Foster + Partners
Star Hollywood ғимаратында жасыл желекке толы тартымды қасбет болады. Оның нақты биіктігі туралы әлі ақпарат жоқ, бірақ ол 22 қабат болады, сондықтан бұл аспан сызығына үстемдік ететін өте биік зәулім ғимарат емес, салыстырмалы түрде қарапайым мұнара болмақшы.
Интерьердің көп бөлігі Голливудтың шығармашылық ортасы үшін икемді кеңсе кеңістігіне арналған және айналаның 360 градустық тамаша көрінісін ұсынады. Шынымен қоршалған кеңістіктің молдығының арқасында ғимараттың әрбір қабатында ішкі табиғи жарық мол болады.
Сондай-ақ көптеген ашық жұмыс орындары мен террассалар жағымды жұмыс атмосферасын орнатады деп жобаланған. Бұған қоса, шатырдың террасасы мен бірінші қабатта мейрамханалар мен қоғамдық орындар ойластырылған.
Қала көшесінен жасыл бақ ғимараттың ішінен тесіп өскендей әсер қалдырады. Иллюстрация newatlas.com сайтынан алынды. Авторлығы: Foster + Partners
Ғимараттың кең ашық алаңдары жасыл желекке толтырылған, бұл идеяны Foster + Partners алғаш рет Люксембургте Icone кеңсе ғимаратында қолданған. Жасыл энергия идеясымен шабыттанған бұл кеңсе ғимараты Бельвалде (Люксембург) орналасқан. Шынында да, өзінің тартымдылығын ескере отырып, Star Hollywood желдетуге үлкен мән береді және кеңседегі ауаны таза ұстау үшін түнде үрлейтін желдету жүйесін қосқан.
«Ғимараттың дизайны табиғи жарық пен желдетуді қамтамасыз етеді және ұйымдардың өркендеп, өзекті және өміршең болуына мүмкіндік беретін ортада адамдарға тиімді және өнімді жұмыс істеуге көмектесетін кеңістіктерді ұсынады. Ашық жұмыс бақтары, табиғи жарық пен жаңа желдету жүйесі Голливудтағы Sunset бульварында таза, жоғары өнімді жұмыс ортасын жасайды», – дейді Foster + Partners-дің аға серіктесі Патрик Кэмпбелл.
CNN-нің хабарлауынша, Star Hollywood 2029 жылы ашылады деп күтілуде. Оны Лос-Анджелестегі The Star фирмасы салып жатыр.
Әуеге ілінген жасыл бақ Нью-Йоркте бар. Фото New Atlas сайтынан алынды. Авторы: Laurian Ghinitoiu
Aikyn.kz бұған дейін де әлемдегі ерекше ғимараттар туралы жазғаны белгілі. Соның бірі Нью-Йорк сәулетшілері ұсынған 314 метрлік ғимарат. The Spiral, яғни «Шиыршық» деп аталатын ғимараттың жасыл белдеуі өте биікте орналасқан.
Сингапурдағы Pan Pacific Orchard ғимаратындағы әдемі жасыл бақ. Фото Darren Soh сайтынан алынды
Жасыл баққа оранған тағы бір ғимарат Сингапурда тұрғызылған. Бау-бақшалы қала деп аталатын бұл жердегі Eden мен CapitaSpring, Pan Pacific Orchard атты әдемі жасыл баққа оранған ғимараттар туралы да біздің бұрынғы материалымыздан оқуға болады.