Бұл жолы «AMANAT» партиясы Түркістан облыстық филиалы атқарушы хатшысының орынбасары, облыстық мәслихат депутаты Қалыйма Жантөреева өз атынан қолдау білдірді.
Депутат 100 түйе жүн көрпе, 300 дана жылы күртеше мен бейсболканы пойызбен жеткізді. Гуманитарлық көмектің жалпы шығыны 8 млн теңге болған. Жаны жомарт әріптестерін партияның облыстық филиалы атқарушы хатшысының орынбасары мен «Жастар Рухы» жастар қанатының еріктілері күтіп алып, Қобда ауданына апарды. Киім-кешектер мен көрпелер аудандағы эвакуациялық пункттерге және тасқын судан зардап шеккен өзге де ауыл тұрғындарына үлестірілді.
Қалыйма Жантөреқызы тасқын судан зардап шеккен ақтөбеліктерге жылы сөзін арнап, қиындықты сабырмен еңсеруге шақырды.
«Осыдан екі жыл бұрын Түркістан облысының Мақтаарал ауданында болған тасқын судың салдарын жұрт болып жұмылып еңсерген едік. Биыл да үйлері суға кеткен ағайынның ауыртпалығын ел болып теңдей бөлісіп жатыр. «Берекені көктен тілеме, бірлігі мол көптен тіле» деген, ынтымақ-бірлігіміздің арқасында бұл зауалды да еңсереміз. Ақтөбенің іргелі жұрты әлі талай қызықты күндерге, табысты сәттерге куә болады деп сенемін», – деді ол.