Тасқын судың салдарынан халықаралық және республикалық автожолдарды су басуда. Су басқан жолдар туралы «ҚазАвтоЖол» ұлттық компаниясының баспасөз хатшысы Сәкен Ділдахмет айтып берді, – деп хабарлайды Aikyn.kz inform.kz-ке сілтеме жасап.
«2024 жылғы 18 сәуірдегі сағат 14.00 жағдай бойынша халықаралық және республикалық маңызы бар автомобиль жолдарында ауа райының жылынуы мен қардың тез еруі салдарынан 3 облыстағы (Ақмола, Қостанай, СҚО) 8 жол жүру учаскесін 6 725 метр су басты. Сонымен қатар 5 облыстағы (Ақмола, Ақтөбе, Атырау, Қостанай, СҚО) республикалық маңызы бар 12 автомобиль жолында (ұзындығы 720 шақырым) көліктің барлық түрінің қозғалысына шектеу қойылды», – деді Сәкен Ділдахмет Орталық коммуникациялар қызметі алаңында өткен баспасөз мәслихатында.
«ҚазАвтоЖол» ұлттық компаниясының мәліметінше, қазіргі уақытта республикалық жолдарда 1 945 адам және 794 бірлік техника су тасқынының алдын алу жұмыстарын атқаруда.