Осы бағыттағы нақты жұмыстар нәтижесінде, облыс жаңартылатын энергия көздерін игілікке асыруды кеңінен қолданысқа енгізіп, біртіндеп болса да энергетикалық тәуелсіздікке қол жеткізе бастады.
Қазір облыста жаңартылатын энергия көзі болып саналатын 22 нысан бар. Олардың жетеуі су электр стансасы болса, тоғызы желден қуат өндіреді және алтауы – күн электр стансасы. Бұлар жалпы алғанда 325,1 МВт электр қуатын өндіріп, аймақтағы электр энергиясына қажеттіліктің жартысынан астамын жауып отыр.
Жасыл энергияның осылайша жедел дамуы дәстүрлі қуат көздеріне тәуелділікті азайтып қана қоймай, сонымен қатар облыс экономикасының өркендеуіне оң ықпал етіп, экологиясын жақсартуға да септігін тигізуде.
Сарапшылардардың айтуынша, парниктік газдар шығарындылары айтарлықтай төмендеген. Сонымен бірге жаңа жұмыс орны көптеп ашылған. Инвестиция тарту арқылы экономикаға серпін бергені – өз алдына бір жетістік.
Өңір басшылығы бұл бағыттағы жұмыстар алдағы жылдары да жалғасын табады деп отыр. Облыста 2026 жылға дейін жалпы қуаты 1 381 МВт болатын тағы 18 жаңартылатын энергия өндіретін жобаны жүзеге асыру жоспарланған. Бұл жобаларға салынатын инвестициялар 937,75 млрд теңгеге жетіп, 803 адам тұрақты жұмысқа тұра алады. Берері мол жоспарларды жүзеге асыру, аймақтың энергетикалық теңгеріміндегі жаңартылатын энергияның үлесін 90%-ға дейін жеткізуге мүмкіндік береді және бұл Алматы облысын Қазақстандағы жасыл энергияның көшбасшыларының біріне айналдырады.
Болат АБАҒАН,
Алматы облысы