Батыс Қазақстан облысы бойынша су тасқынынан зардап шеккен 9671 отбасына 3 млрд 570 млн теңге көлемінде бір жолғы әлеуметтік көмек берілді, – деп хабарлайды Aikyn.kz облыстық әкімдіктің баспасөз қызметіне сілтеме жасап.
Қазір тұрғындарға 150 айлық есептік көрсеткіш көлеміндегі әлеуметтік төлемдерді беру жұмыстары жалғасуда. Бүгінге дейін мыңға жуық отбасы аталған әлеуметтік көмекті алды.
Су тасқынынан зардап шеккен 5 ауданның тұрғындары үшін 401 үйдің құрылысы жүріп жатыр. Тиісті мердігер компаниялар анықталды.
«Мемлекет басшысының тапсырмасы аясында су тасқынынан зардап шеккен тұрғындарға жан-жақты қолдау көрсетілуде. Тұрғын үйлері жарамсыз болған 3 аудан бойынша үй сатып алуға 79 өтініш түскен. Бүгінгі күнге дейін аталған аудандар бойынша 567 млн теңгеге 27 үй сатып алынды. Сатып алу жұмыстары жалғасады. Құрылыс жұмыстарының сапасы мен уақытылы аяқталуын да тікелей бақылауда ұстап отырмыз», – деді облыс әкімі Нариман Төреғалиев.
Бұдан бөлек, Орал қаласындағы саяжай тұрғындары тарапынан туындайтын құқықтық мәселелер бойынша арнайы жедел топ жұмыс істеуде.
Қазір саяжайлардағы шығындарды есептеу жөніндегі комиссия штаттық режимде жұмыс істеп, бағалау жұмыстарын жүргізуде.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.