Бангладештік жас инженер-студент, білімге құштар Шаим Хоссен мырза Алматыдағы Сәтбаев Университетінің жатақханасында тұрады. Хоссен Қазақстанға «Қазақстан Үкіметінің 2021 жылғы стипендиясы» бағдарламасымен келді. Оның мақсаты – тек диплом алу ғана емес, жаңа мәдениетке терең бойлау. Осыған байланысты Aikyn.kz редакциясы Сәтбаев университетінің студенті Шаим Хоссенмен тілдесіп, Қазақстандағы білім, мәдениет, ғылыми көзқарас хақындағы пікірін сұрады. Оның мұнда білім алуға келуі – Қазақстанның жаһандық стандарттарға сәйкес келетін әлемдік деңгейдегі қолжетімді білімге деген ұмтылысының куәсі.
Сәтбаев университетінде әлемдік деңгейдегі білім алу
«Қазақстанда жоғары дәрежелі білім алу – стратегиялық қадам, – деп түсіндіреді Хоссен құлшына сөйлеп:
– Ал Сәтбаев университеті жоғары білім берудің алдыңғы қатарында келеді, озық технологиямен жабдықталған, мұнда әртүрлі білім беру бағдарламалары бар және ғылыми потенциалы да өте бай, әрі танымал».
Ол сөзін былай деп жалғастырды: «2010 жылдан бастап Қазақстан Еуропалық жоғары білім беру кеңістігінің (EПВО) толыққанды мүшесі болып саналады, бұл білім кеңістігі Болон үдерісін ұстанады. Бұл дегеніміз: мен Сәтбаев университетінде алатын инженерлік дипломды бүкіл әлем мойындап қана қоймайды, ол әлемдік стандартты құрылымға сәйкес келетін болады, бұл өз кезегінде келешекте шетелде оқуға мүмкіндік береді».
Білім алу үшін тамаша жағдай үздіксіз еңбек ету екенін ол да мойындайды:
«Мүмкіндіктер әрбір аймаққа байланысты әртүрлі болуы мүмкін, алайда Үкіметтің білім беруді алыс аймақтарға дейін кеңейту әрекеті шынымен де қуантады», – дейді ол.
Оқудан тыс: қазақ мәдениеті мен қазақтар жейтін ас
Хоссеннің қызығушылығы формулалар және инженерлік принциптермен ғана шектелмейді. Ол қазақ мәдениетіне де қызығады. Сөйтіп, оның тоқыма кілемге, ұлттық киімге ерекше назары ауған.
«Бұл көз қызықтырады», – дейді ол қазақтың дәстүрлі киімдері кестемен бейнеленген әдемі қабырғаны көрсетіп. «Тарихы бай, күрделі өрнектермен безендірілген таңғажайып көйлектер, аңызға айналған қонақжайлылық дәстүр – бәрі-бәрі баурап алады». Сосын көзін қысып, күлімсіреп: «Әрине, ұлттық тағам да өте тартымды! Әсіресе бешбармақ пен палау өте дәмді!», – дейді.
Өзара түсіністік көпірін орната отырып, тілдік кедергілерді жеңу
Қазіргі уақытта оның қазақ тілін меңгеру деңгейі бастауыш (A2) деңгейінде болса да, Хоссен тілдік кедергіні жеңу үшін белсенді түрде жұмыс істеп жатыр.
«Тіпті базалық білім деңгейінде сөйлесе алудың да үлкен маңызы бар. Бұл маған жергілікті халықпен тереңірек байланыс жасауға және олардың мәдениетін жақсырақ түсінуге мүмкіндік береді, сонда ғана мен өзімді қадірлі қонақ ретінде сезіне аламын», – дейді ол.
Көзіндегі ұшқын оның көбірек білуге деген ынтасын анық көрсетеді.
Ұқсастықтарды тауып, айырмашылықтарды қабылдау
Географиялық арақашықтыққа қарамастан, Хоссен өз елі мен Қазақстан арасында таңғаларлық ұқсастықтар табады.
«Бангладеште де, Қазақстанда да жоғары білімге басымдық беріледі, ал отбасылық құндылықтар жоғары бағаланады», – дейді ол. Соған қарамастан, ол Қазақстанның ерекшелігін даусыз мойындайды. «Жер аумағының кеңдігі, көшпелілердің бай мұрасы – осының бәрі бірегей мәдени тәжірибені тудырады», – дейді ол байыпты сөйлеп.
Оқудан тыс саяхат: Түркістанның бай мұрасын зерттеу
«Менің Қазақстандағы саяхатым әсем Алматыдан да асты», – дейді Хоссен күлімсіреп.
«Мен тарихи және мәдени маңызы бар Түркістан қаласына қызықты саяхат жасадым», – деді Ш. Хоссен.
Ол ЮНЕСКО-ның Бүкіләлемдік мұраларының тізіміне енген Қожа Ахмет Йассауи кесенесі мен Қазақстанда ислам дінінің бай мұрасын айғақтайтын сәулет өнерінің басқа да тамаша ғимараттарына таңданысын білдірді.
«Бұл елдің сан алуан мәдени мұрасы туралы менің терең түсінігімді шын мәнінде байытатын тәжірибе болды», – дейді ол.
Үздіксіз оқу да – саяхат
«Қазақстанға келу мен үшін тамаша жаңалық болды, – деп түйіндеді Хоссен өз сөзін.
– Мен Қазақстан Үкіметінің стипендиялық бағдарламасына қатысу құрметіне ие болғаныма өте қуаныштымын, бұл Қазақстанның халықаралық студенттерді тартуға және жаһандық академиялық қауымдастықты дамытуға деген ұмтылысын көрсетеді. Менің негізгі мақсатым – оқуда үздік болып, инженерлік мамандықты меңгеру болса да, мен кәсіби білімімді одан әрі кеңейте түсетін мүмкіндіктерге әрқашан дайынмын. Тіпті қазақстандық студенттермен бірге ғылыми жобаларға қатысу болашақтағы қызықты перспектива болуы да мүмкін!», – дейді шетелдік студент.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.