Жиынға Парламент Мәжілісінің депутаттары, «АMANAT» партиясы, Ауыл шаруашылығы министрлігі және республикалық Ардагерлер кеңесі, «ЕлАна» қоғамдық, әлеуметтік-танымдық сайты, республикалық «Мөлдір бұлақ» балалар журналының және Қостанай облысы, Жанкелді, Аманкелді ауданының, Алматы облысы Кемертоған ауылының өкілдері қатысты.
Qazaqstan dauiri ЖШС-ның бас директоры Сәуле Мешітбайқызының қолдауымен ұйымдастырылып келе жатқан экспедицияның мақсаты – газет ұжымы жергілікті әкімшіліктің ауыл шаруашылығы, білім басқармаларының қызметкерлерімен, сондай-ақ облыстық, аудандық «АMANAT» партиясының өкілдерімен бірлесіп, шалғайдағы ауылдарды аралап, ондағы қордаланған мәселелерді зерттеп, халықтың талап-тілегін газет бетінде жариялап, тиісті құзырлы мекемелердің назарына ұсыну және аймақтардың дамуын ақпараттық қолдау.
Сәуле Мешітбайқызының айтуынша, 2023 жылы газет ұжымы Ауыл шаруашылығы министрлігі, Оқу-ағарту министрлігі, республикалық Ардагерлер кеңесі, «Елана» қоғамдық, әлеуметтік-танымдық сайты, республикалық «Мөлдір бұлақ» балалар журналымен бірлесіп, республиканың түкпір-түкпірін аралап шықты.
– Біздің ұжым, газет осылайша халық пен биліктің ортасында алтын көпір болып отыр. Жыл сайын екі мәрте өтетін дәстүрлі экспедиция барысында, ауылдық жерлердегі инфрақұрылым, білім беру мекемелерінің жағдайы, жергілікті орындағы кәсіпкерліктің дамуы, денсаулық сақтау саласындағы проблемалардан бөлек, ұрпақ тәрбиесі, ұлттық құндылықтар төңірегінде көптеген материал дайындалып, басылым бетінде жарияланып келеді. Бұл науқандық шара емес. Шалғайдағы елді мекендердегі халықпен бетпе-бет кездесіп, тұрмыс-тіршілігімен, әл-ауқатымен танысып, тиісті құзырлы мекемелермен бірлесіп, қордаланған мәселелердің шешілуін қадағалап отырамыз, – деді Сәуле Мешітбайқызы.
Ал газеттің бас редакторы Ертай Айғалиұлы «Ұлтымыздың қаймағы мен аймағы орналасқан Алтын бесік ауылымыздың жағдайын күйттейік, жөндейік, соған қал-қадарымызша үлес қосайық» дейді. Жиын барысында Ертай Айғалиұлы ауыл шаруашылығы саласындағы «Бармақ басты, көз қысты» жең ұшынан жалғасқан сыбайлас жемқорлықтан бастап, алыс аймақтардағы газет ұжымы және өзі тікелей барып, көзімен көрген бірқатар мәселені атап-атап айтып берді. Жалпы алғанда еліміз ауылдарының негізгі ортақ мәселесі – жол қатынасы, ауызсу, интернет және жайылым тапшылығы, қазақы қой тұқымының кемуі, малдың жемшөбінің қымбаттығы, субсидияның берілу механизмі секілді жиі айтылып келе жатса да әлі шешімін таппай отырған қордалы мәселелер.
– Рас, қордаланған проблемалар, көкейтесті мәселелер шаш етектен. Әлбетте, «Бәрі құрып бітті» деп ауызды құрғап шөппен сүртуге болмас. «Мемлекеттік тараптан ауылға, ауыл шаруашылығына қолдаулар ұшан-теңіз. Өркендеп өз қолдары өз ауыздарына жетіп, қағанағы қарқ, сағанағы сарқ болып аста-төк өмір сүрмесе де жақсы тұрмыс кешіп, әлеуметтік жағдайларын түзеп алған ауылдар баршылық. Бірақ ондай ауылдар аз», – деді газет басшысы.
Газет ұжымы «Бабалар рухына тағзым», «Табиғатыңды аяла», «ХХІ ғасырдың аулы қандай болмақ?» деген нақты тақырыптар төңірегінде жұмыс жүргізіпті. Ауылдардағы білім беру, денсаулық сақтау, инфрақұрылым және энергетика саласындағы қиындықтар да күрделі күйінде қалып отыр. Торғай өңірінен келген өкілдер биылғы апаттан кейінгі елдің жағдайын, мал-жанның, иен қалып жатқан Торғай даласының құлазыған ауылдарының тағдыры жайлы нақты мәселелерді ортаға салды.
Экспедиция назарына көптен бері шешімі табылмай келе жатқан Алматы облысындағы Кемертоған ауылының мәселелері де ілінген. Онда білім беру, инфрақұрылым және энергетика саласындағы қиындықтар ушыққан. Қорытынды жиында Данияр Қасқарауов, Парламент Мәжілісінің депутаты:
– Облыс, аудан, ауыл әкімдерінен ешқандай нәтиже көрмей отырмыз. Нақты жауап бере алмайды. Ешқандай шешім шығара алмайды. Бұл мәселе былай айтқанда күйіп тұр қазіргі уақытта. Сол себептен енді бұл қашан шешімін табады, қалай шешіледі, әзірге хаттан, сауалдың жауабын әлі алған жоқпыз. Енді каникулға да аз уақыт қалды. Барғаннан кейін оны әрі қарай да қарайтын боламыз, – деді.
Тілекгүл ЕСДӘУЛЕТ