Ерлік ерлік жасады

Шпагамен семсерлесуден Қазақстан командасының ең жас мүшесі Ерлік Сертай құрлық додасының қола жүлдегері атанды. Бұл – отандық семсерлесу спортындағы  тарихи көрсеткіштердің бірі.  Себебі бұған дейін қазақ балалары мұндай биікке шықпаған.

Ерлік Сертай – Париж Олимпиада­сына жолдама алған төрт шпага­шы­ның бірі. Ол командаластары  Эльмир Әлімжанов, Руслан Құрбанов және Ва­дим Шарлаимовпен бірге төрт­­­жыл­дық додасына лицензия жеңіп алды. Атал­ған төрттік әлем  ку­богі ке­зеңде­рі­нің қорытындысы бойынша жаз­ғы ойын­дарға қатысу мүм­кіндігін иеленді. 

Бүгінге дейін Ерліктің жүлделері ко­манданың ортақ жеңісімен есептелетін. Ал Кувейтте өтіп жатқан Азия чемпионатында ол алғаш рет ересектер арасындағы ірі жеңісіне қол жеткізді. Алматы­лық спортшы құрлық біріншілігінде үз­дік үштікке енген. 

«Бұған дейін ірі жарыстарда жекелей сын­да жүлде алып көргем жоқ. Сондық­тан бұл медальдың құны алтынмен пара-пар. Анығын айтар болсам, алған медалімнен гөрі осы біріншілікте қалай өнер көрсеткенім өзіме ұнады. Сенім­ді­лік пайда  болды. Семсерлесуде жарыс­тар бір күн бойы өтеді. Сондықтан бар кү­шіңді сарп етпей, үнемдеп жұмсау да аса маңызды.  Жарыс өте жоғары деңгейде өткендіктен, психологиялық және эмо­ционалдық жағынан да оңай болмады», – дейді спортшы. 

Жүлдеге барар жолда Сертай іріктеу кезеңіндегі бес кездесуде жеңіске жетіп, турнир кестесінде бесінші орыннан көрінді. 32 үздік спортшының қатарына ену үшін ол ирандық Бейк Бехнамды 15:8 есебімен жеңді. 1/16 финалда Ирак өкілі Аббас Мошинді 15:11, 1/8 финалда қытайлық Ванг Цидзені 15:12 есе­бімен жарыс жолынан шығарды. Ширек  финалда Сертай өзінің командаласы, тәжірибелі Эльмир Алимжанов­пен кездескен болатын. Ішкі бәсекелес­тіктің жоғарылығына қарамастан, Ерлік өзінің ең үздік нәтижесін көрсетіп, жар­­­тылай финалға өтті. Финал жолдамасына таласта біздің спортшымыз Гон­конг өкілі Хо Вай Хангтен 13:15 есе­бі­мен жеңі­ліп, жекелей сында қола медаль иеленді. 

Семсерлесуден Қазақстан команда­сы­ның өкілі, мемлекеттік жаттықтырушы Тимур Байтасовтың айтуынша, бұл чемпионатта ешкім де Ерліктен «ер­лік» күтпеген. 

«Жас спортшы болғандықтан, біз Ер­лік Сертайдан емес, басқа да тәжірибе­лі спортшыларымыздан медаль күттік. Бір­ақ Ерліктен күткен емеспіз. Өйт­кені ол – командадағы жас спортшылардың бі­рі. Оның қола медалі біз үшін қуаныш­ты жайт.  

Турнир барысында ол командаласы Эльмир Алимжановты жеңді. Екеуі үнемі жарысқа бірге  қатысады, ел чемпионаттарында, жаттығу жиындарында кездеседі. Сондықтан бірін-бірі жақ­сы біледі. Ерліктің де деңгейі жоғары екенін ұмытпау керек. 

Ал Азия чемпионаты спортшылардың рейтингі үшін өте маңызды. Олимпиада жеребесі рейтингке байланысты тартылады. Сондықтан рейтингте жо­ғары ұпай жинап, мейлінше жоғары орналасу әрбір спортшы үшін маңызды. Ме­дальдан әлі үміттіміз. Рапира мен саб­ля­дан сынға түсетін қыз-жігітте­ріміз бар», – деді Т.Байтасов.

Қазір шпагашылар командалық жарыста сынға түсуге дайындалуда. Командалық сында Ерлік Сертай бас­таған төрт­тік Азия ойындарының финалына дейін жетіп, күміс медальды ел қоржынына салған болатын. 

АЗИЯ БІРІНШІЛІГІНДЕ ҚАЗАҚСТАН НАМЫСЫН ТӨМЕНДЕГІ СПОРТШЫЛАР ҚОРҒАУДА:

Шпага, әйелдер:

Софья Николайчук, Виктория Қайдарова, Владислава Андреева, Наталья Зинякова; 

Шпага, ерлер: 

Руслан Құрбанов, Эльмир Әлімжанов, Вадим Шарлаимов, Ерлік Сертай; 

Сабля, әйелдер: 

Айгерім Сарыбай, Карина Доспай, Анастасия Гулик, Жасмин Капыджы;

Сабля, ерлер: 

Артем Саркасян, Саттархан Назарбай, Жанат Нәбиев, Бақдәулет Құралбекұлы;

Рапира, әйелдер:

София Ақтаева, Құлжан Түсіпбекова, Алена Гноева, Алина Ескендірова; 

Рапира, ерлер:

Ғалым Нұрымов, Темірлан Қалиев, Тимофей Семенов, Никита Пономарев.

Арда КЕМЕЛ