Атақты компанияның Strawberry атты құпия жобаны әзірлеуге кіріскенін Reuters жазды. Құпия әзірленіп жатқан ЖИ жүйесі қандай мақсатта қолданылады деген сұрақтың жауабын Aikyn.kz осы материалға сүйеніп іздейді.
Strawberry мұқият қорғалатын құпия болғандықтан, жобамен аз ғана инженерлер командасы жұмыс істейді. Фото walletinvestor.com сайтынан алынды
Reuters осы жобамен және оның ішкі құжаттарымен таныс дереккөзге сүйеніп, ChatGPT-ді жасаушысы OpenAI Strawberry (Құлпынай) құпия атауы бар жобамен жұмыс істеп жатқанын хабарлады. Жоба қазіргі қолданыстағы ұсынатын ChatGPT нұсқаларымен салыстырғанда жаңа модель адам сияқты ойлау қабілеттерін көрсететін болады деп болжануда.
OpenAI-дің ішкі құжаттарының көшірмесіне сәйкес, Strawberry жобасы мұқият қорғалатын құпия болғандықтан ол туралы OpenAI-дің қызметкерлері де білмейді. Жобамен аз ғана инженерлер командасы жұмыс істеп жатыр.
Бұл жасанды интеллект жүйесі сұрауларға жауап беріп қана қоймай, интернетте автономды және сенімді іздеу жұмыстарын жүргізіп, «терең барлау» деп аталатын қабілеттерге ие болады. Оннан астам ЖИ зерттеушілерінің сұхбатына сәйкес, бұрын бұндай дағдылар ешбір ЖИ жүйелерінде болмаған.
Bloomberg агенттігінің хабарлауынша, жаңа модельде адамға ұқсас ойлау дағдылары бар. Фото prodelo.by сайтынан алынды
Strawberry жобасы туралы қойылған сауалға OpenAI өкілі жалпылама: «Біз ЖИ үлгілерінің әлемді адамдар сияқты көріп, түсінгенін қалаймыз. Жаңа ЖИ мүмкіндіктерін үздіксіз зерттеу саладағы кең таралған тәжірибе және біз бұл жүйелер уақыт өте келе өз қабілеттерін жетілдіретініне сенімдіміз», – деп жауап берген. Компания өкілі Strawberry туралы сұрақтарға тікелей жауап беруден бас тартқан.
Strawberry жобасы бұрын Q* деген атпен белгілі болған және екі дереккөз осы жылдың басында OpenAI қызметкерлері Q* демонстрациялары деп таныстырған үлгімен танысқанын айтады. Олар бүгінгі коммерциялық қолжетімді нұсқалармен салыстырғанда жаңа модель күрделі ғылыми және математикалық сұрақтарға жауап бере алатынына таңғалған.
Bloomberg агенттігінің хабарлауынша, сейсенбіде (9 шілде) өткен ішкі жалпы жиналыста OpenAI жаңа зерттеу жобасының демонстрациясы көрсетілген. Агенттіктің айтуынша, жаңа қосымшада адамға ұқсас ойлау дағдылары бар.
OpenAI өкілі бұндай жиынның өткенін растаған, бірақ оның мазмұны туралы мәліметтер беруден бас тартқан. Reuters болса бұл жиында көрсетілген жобаның Strawberry екенін анықтай алмаған.
Reuters сауалнамасына қатысқан зерттеушілер ЖИ контекстіндегі пайымдау жасанды интеллект жүйелері алдын ала жоспарлауға, физикалық әлемнің жұмысын көрсетуге және күрделі көп сатылы мәселелерді сенімді шешуге мүмкіндік беретін мүмкіндіктер беретінімен келіседі.
Стэнфорд профессоры Ноа Гудман: «Менің ойымша, бұл қызықты және қорқынышты. Біз адамдардың болашағы туралы ойлануымыз керек». Фото itbiznes.pl сайтынан алынды
Google, Meta және Microsoft сияқты басқа компаниялар, сондай-ақ ЖИ зерттеулерін жүргізетін көптеген академиялық зертханалар сияқты, ЖИ үлгілеріндегі пайымдауды жақсартудың әртүрлі әдістерімен тәжірибе жасауда. Дегенмен зерттеушілер үлкен тілдік модельдердің (LLMs) жаңа идеялар туғызуға және ұзақ мерзімді жоспарлауға қабілетсіз деп санайды.
Мысалы, қазіргі заманғы ЖИ пионерлерінің бірі, Meta-да жұмыс істейтін Янн Лекун «LLM-дер адамның ойлау қабілетіне ие емес» деп жиі айтады.
Strawberry болса OpenAI-дің осы проблемаларды шешуге арналған негізгі жобасы болуы мүмкін. Соңғы айларда компания анағұрлым жетілдірілген ойлау мүмкіндіктері бар технологияны шығаруға дайын екені белгілі болған.
Стэнфорд университетінің профессоры Ноа Гудман Reuters агенттігіне берген сұхбатында: «Менің ойымша, бұл қызықты және қорқынышты. Егер жағдай осылай жалғаса берсе, біз адамдардың болашағы туралы ойлануымыз керек», – дейді.
Бұндай зерттеулердің барысында OpenAI бағдарламалық жасақтама мен машиналық оқыту инженерлерінің жұмысын орындау арқылы өз мүмкіндіктерін байқап көруді де жоспарлаған сияқты.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.