Биылғы жылдың 27 наурызы батыстағы ағайынның есінде ұзақ сақталары сөзсіз. Қаннен қаперсіз үйлерінде жатқан ағайынды бір кеште су алып кеткені бар. Судың қаупі бары бірнеше мәрте айтылса да, дәл солай бір түнде елді су алып кететінін ешкім болжамады-ау сол кезде. Су мен өрттен келетін апат айтып келмейді деген сол шығар. Дәл сол көктемгі су тасқынында Сырым ауданы бойынша 265 үйге су кіріп, халық эвакуациялық пункттерді жағалап кетті. Одан кейін шамасы келгендер пәтер жалдап бөлек кеткен. Сондай отбасылардың бірі – Рауан Хасанғалиевтің жанұясы. Қарт ата-анасы, бала шағасымен төрт ай пәтер жалдап тұрған. «Балаларым өте кішкентай, ауырғаны-сырқағаны бар оңайға соқпады» дейді жас отбасының отағасы Рауан мырза.
– Басында есеңгіреп қалдық. Далада қалдық, болдық енді қайда барамыз деп есіміз шықты. Балаларым өте кішкентай, әйелім бала күтіміне байланысты демалыста. Ата-анам мен балаларыммен басында бір ай эвакуациялық пунктте тұрдық. Шынымды айтсам, жаңа үй береді деп ойламадық. Үй бітіп, қоныстойын тойлайтын күнге жеттік. Отбасымызбен қатты қуандық. Құдайға шүкір, үлкен әулетпіз. Енді осы жаңа баспанада бала-шағамызбен қартаюды жазсын, –дейді жаңа үйге қол жеткізіп жатқан Рауан.
Бір мезетте Сырым ауданында 100 отбасыға пәтер кілті табысталды. Осыдан тура 1 ай бұрын 14 отбасы үйлі болған еді. Сырым ауданында 38 үй жаңа орыннан салынып отыр. Бұл ауданның суға кетпейді деген биік нүктесінен салынған үйлер. Қаз-қатар тізілген заманауи, әдемі қызыл кірпіштен салынған үйлер көздің жауын алады. Бұл жер өзі бөлек қалашық іспеттес болып қалған. Аудан тұрғындары бұл жаңа шағынауданды «Қазақстан халқына қорының» құрметіне «Қазақстан халқына» шағынауданы деп атаған. Себебі бұл аудандағы 114 үйдің барлығына да «Қазақстан халқына» қоры демеушілік көрсеткен.
– Барлық қиындық артта қалып, жаңа қонысқа көшіп жатырсыздар. Қоныстарыңыз құтты болсын! Биыл БҚО бойынша су тасқынынан зардап шеккендерге арнап облыс бойынша 775 үй салынып жатыр. Оның ішінде 374-і Орал қаласынан, қалған 401 үй 5 ауданнан салынып жатыр. Қиын-қыстау сәтте өңірімізге қолдау білдірген «Қазақстан қалқына қорының» төрағасы Болат Жәмішев мырза ортамызда тұр. Жалпы, бұл қор соңғы екі жылда облысқа 11 млрд теңге қаражат бөлді, – деп атап өтті Нариман Төреғалиев.
Ал сырымдықтармен кездескен Болат Жәмішев елдің қуанышына құтты болсын айтып, ақ тілегін жаудырды.
– Бұл күн – бәріміз үшін қуанышты күн! Дәл осы тарихи күні сіздердің орталарыңыздан табылғаныма қуаныштымын. Біздің қордың мақсаты да осы. Елдің игілігіне қызмет ету. Біз осы мақсат жолында еңбек етіп келеміз. Мұндай қуаныш Қазақстанның әр өңірінде болады, – деді Қазақстан халқына қорының төрағасы Болат Жәмішев.
Мұндай қоныстой Батыс Қазақстанның басқа аудандарында да жалғасып жатыр. Мәселен, Бәйтерек, Теректі аудандарының халқы да дәл осылай жаңа қонысқа орналасуда. Ал Орал қаласының өзінде 1 400-ден астам отбасы үйлі болып үлгерді. Қаладан үй алып жатқандар – қала маңындағы саяжайлардың тұрғындары. Биылғы су тасқынында Орал қаласының маңындағы 15 мыңға жуық саяжай учаскесі суға кеткен болатын. Су тасқынынан зардап шеккен 10 мыңнан астам адам көмек сұрап өтініш білдірген. Комиссия тұрғындардың өтінішін қарауды, үйлерге техникалық тексеріс жүргізуді әлі жалғастырып жатыр. «Тірі адам тірлігін жасайды» деп судан аман қалған ағайын бас амандығына шүкірлік айтып отыр. «Биыл судан зардап шеккен халықтың бірі де назардан тыс қалмасын» деген Президент тапсырмасына сәйкес облыста қажетті жұмыстар атқарылып келеді.
Жанат ҚАЙЫРҒОЖИНА,
Батыс Қазақстан облысы