Енді Шымкент қаласындағы бұрын жекешелендірілген стратегиялық сумен жабдықтау және су бұру объектілерін мемлекет меншігіне қайтару жұмыстары жүріп жатыр. Бұл туралы Шымкент қаласы әкімінің орынбасары Айдын Кәрімов Өңірлік коммуникациялар қызметі алаңында өткен баспасөз конференциясында атап өтті. Жиынға қала әкімінің орынбасарынан бөлек Шымкент қаласы Энергетика және инфрақұрылымды дамыту басқармасының басшысы Рзабек Меңдіқұлов та қатысып, БАҚ өкілдері қойған сауалдарға жауап берді.
«Қазақстан Республикасы Премьер-Министрінің төрағалығымен өткен Экономиканы монополиядан арылту жөніндегі комиссияның шешімін орындау мақсатында Шымкент қаласының әкімдігімен заңсыз берілген жер телімдері мен нысандарды мемлекет меншігіне қайтарып алу жұмыстарына белсене кіріскен. 1996-1998 жылдары Шымкент қаласының сол кездегі әкімі тұрғын үй-коммуналдық шаруашылығын монополиядан арылту аясында сумен жабдықтау және су бұру жүйелерін жекеменшікке беру туралы шешім қабылдаған. Осыған байланысты қазір заңсыз жекешелендірілген нысандарды қайтару жұмыстары қарқынды жүріп жатыр», – деп атап өтті Айдын Мейрамбекұлы.
Айта кетейік, жекешелендірілген ұйымдардың құрылтайшылары 1998 жылы біртұтас «Су ресурстары-Маркетинг» ЖШС-на бірігу туралы шешім қабылдаған. Оның бас директоры болып бұған дейін Шымкент қаласының әкімі қызметін атқарған Анарбек Орман тағайындалды. Жекешелендірілген соң мемлекеттік коммуналдық кәсіпорын балансында су құбырлары ғана қалған-ды. Қала әкімінің орынбасары тасымалдау барысында қаладағы жалғыз мемлекеттік коммуналдық кәсіпорынның екі су қабылдағышы «Тассай-1» және «Тассай-2», «Уникансервис» тазарту қондырғысы және «ТрансВиК» автокөлік шеберханасы еншілес ұйымдарға бөлінгенін жеткізді. Одан әрі құрылған төрт еншілес кәсіпорын мен қосымша «Бадам-Сайрам» және «Ақбай-Қарасу» су қабылдағыштары да жекешелендіруге берілген.
«2003 жылы бекітілген Су кодексіне сәйкес, қалаларды сумен жабдықтауды қамтамасыз ететін су тарту құрылыстары, сорғы стансалары, су құбырын тазартқыш құрылыстар мемлекет меншігі саналады және иеліктен шығаруға жатпайды. Сонымен қатар Астана және Алматы қалаларымен салыстырғанда Шымкентте су тарифтері тұрғындар үшін де, бюджеттік ұйым мен заңды тұлғалар үшін де бірнеше есе жоғары. Мысалы, Шымкентте тариф шамамен 97 теңге болса, Астанада бұл көрсеткіш 1,5 есе төмен, яғни 65 теңге. Алматымен салыстырғанда 2 есеге жуық төмен, 55 теңгені құрайды. Ал электр энергиясының құны Шымкентте Астана мен Алматыға қарағанда айтарлықтай төмен», – деп атап өтті брифинг барысында Айдын Мейрамбекұлы.
Сонымен қатар Шымкентте кәріз тарифтері де қос республикалық маңызы бар қаламен салыстырғанда жоғары екенін еске салған жөн. Атап айтқанда, Шымкентте тұрғындар үшін кәріз тарифі 51 теңгеге жуықтаса, Алматыда 2 есе төмен, Астанада шамалас. Ал бюджеттік ұйымдар үшін тариф Шымкентте 415 теңге, Астанада 1,5 есе төмен, яғни 281 теңге. Алматыда 5 есе төмен, 81 теңгені құрайды. Мұндай айырмашылық заңды тұлғаларға арналған тарифте де байқалады. Сонымен қатар Шымкентте кәріз тарифтері жоғары болғанына қарамастан тазартудан кейінгі су өзенге ағызуға жарамсыз. Сондай-ақ Шымкент қаласы тұрғындарының сарқынды судың иісіне қатысты арыз-шағымдары бар. Бұл «Су ресурстары-Маркетинг» ЖШС-ның сарқынды суды тазарту және шығару жұмыстарының өз деңгейінде емес екенін көрсетеді.
Сумен жабдықтау және су бұру жүйесінің азаматтар үшін маңызды екенін ескере отырып, Шымкент қаласының әкімдігі бұрын жекешелендірілген стратегиялық сумен жабдықтау және су бұру нысандарын мемлекет меншігіне қайтаруды көздеп отыр екен. Брифингте объектілерді мемлекет меншігіне қайтару сумен жабдықтау және су бұру бойынша тарифтік шығындарды ұстау бойынша жүйелі жұмыс жүргізуге мүмкіндік беретіні жөнінде де сөз болды.
Назгүл НАЗАРБЕК,
Шымкент қаласы