Алматы облысының полициясы бұған дейін әлеуметтік желіге шағымданған ананың арызы жөнінде түсініктеме берді. Ол әйел біреулер ұлынан ақша бопсалап жүр деп мәлімдеген еді, – деп хабарлайды Aikyn.kz.
Әлеуметтік желілерде бассыздықты тоқтатуды сұраған әйелдің видеосы тараған еді. Оның айтуынша, екі жыл бойы Жабайы Арманның ұйымдасқан қылмыстық тобының қатысушысы – "Чина Албан" атты біреу ұлынан ақша талап еткен. Әйел ұлына қарақшылар қоқан-лоқы көрсетіп, ұлына юбка кигізіп, ролик түсіріп, ақша талап еткенін айтады. Президенттен көмек сұрайды.
Алматы полициясы бопсалау фактісі бойынша қылмыстық іс қозғалғанын хабарлады.
"Күдіктілер ұсталып, уақытша ұстау изоляторына қамалды. Басқа жағдайлар анықталып жатыр. Тергеу барысы Алматы ПД басшылығының бақылауында", – деп хабарлады Алматы полициясы.
Бұған дейін ІІМ Ұйымдасқан қылмысқа қарсы күрес департаментінің басқарма бастығы Қуандық Алпыс «Дикий Арманмен» байланысы болған 15 адам ұсталғанын хабарлаған еді.
Былтыр 21 қыркүйекте Арман Жұмагелдиев пен Қайрат Құдайберген және басқа да тұлғаларға қатысты қылмыстық іс бойынша алдын ала тыңдау аяқталған.
«Дикий Арман» лақап атымен танылған Арман Жұмагелдиев 2022 жылы 7 қаңтарда ұсталған. Сол жылы сәуірде Қайрат Құдайберген ұсталды.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.