Биыл БҚО-да жылыту маусымына дайындық барысында облыс әкімі Нариман Төреғалиевтің бұйрығымен облыстық штаб құрылған болатын. Осы штаб мүшелері облыстың жылыту маусымына дайындығымен айналысты. Жылдағы дәстүр бойынша көктем шығып, жер аяғы кеңіген бойда алдағы қысқа дайындық басталады. Мұндай дайындықтар кезінде электр желілері мен жылыту желілеріне жөндеу жұмыстары жүргізіледі.
Биылғы жазда 288 шақырым инженерлік желілерге жөндеу жүргізілген. Мұның 4,2 шақырымы жылыту желілері, ал қалғаны су мен газдың желілері. Біздің облыс жылыту жүйесіне газды пайдаланады, осы ретте 4,5 шақырым газ өткізу желілері жөнделгенін атап өтейік.
– Биылғы жылыту маусымына дейін бюджет есебінен бірнеше нысанға жөндеу жүргізу жоспарланған болатын. Қазір су бұратын төрт басты кәріздік сору стансаларына жөндеу жұмыстары жүргізілуде. Бұлардың ішінде екінші және үшінші кәріздік сору стансаларының құрылысы биыл аяқталады. Қалғаны 2025 жылға ауысады. Бұдан басқа, №5 жылу магистраліне және «Жайықжылуқуат» АҚ-ның №1 турбоагрегатын қайта жаңғырту жұмыстары аяқталуда, құрылыс монтаждау жұмыстары 80-95% орындалып отыр. №2 жылу магистраліне мердігер мекемені анықтау бойынша жұмыстар жүргізілуде. Ақсай қаласында 4, 5 және 10-шағынаудандарын сумен жабдықтау желілеріне қайта жаңғырту жұмыстары 30-50% аяқталды. Барлық жоба толық қаражатпен қамтамасыз етілген, жылыту маусымына дейін аяқтауды жоспарлап отырмыз, – деп атап өтті БҚО Энергетика және ТҮКШ басшысы Мирас Мүлкай.
Жылыту маусымы үшін Орал қаласында газ ғана қолданылады. Ал көмір негізінен аудандағы, ауылдағы әлеуметтік нысандар үшін пайдаланылады.
Штаб отырысында айтылғандай, жылыту маусымына білім беру нысандары мен мәдениет нысандары 97 пайызға дайын.
БҚО-да негізі жылыту маусымында аса бір қатты қиындықтар бола бермейді. Апталап, айлап жылусыз қалған кездер соңғы жылдары болмаған. Бірақ Оралда кейбір көпқабатты үйлер қыста жылусыз қалатын кездері болады. Қаланың дәл ортасында отырып, «бізде жылу жоқ» деп тұрғындар талай дабыл қақты. Біз осы мәселені «ЖайықЖылуҚуат» мекемесінің басшысының орынбасары Бекболат Камешовке айттық.
– Иә, былтыр Зашағандағы бір-екі үй жылусыз қалды. Бірақ ол орталық жылу стансасының проблемасы емес. Біз жылуды үйге дейін жіберіп тұрмыз. Жертөледегі құбырлардың бәріне жылу барып тұрды, талай тексердік. Бұл үйлердің жеке мәселесі. Сол үйлердің пәтер иелері кооперативі өзара келісуі керек, – деп атап өтті «ЖайықЖылуҚуат» мекемесі басшысының орынбасары Бекболат Камешов.
Орал қаласы бойынша 1 210 көпқабатты тұрғын үй бар екен. Ал осы үйлер жылыту маусымына тек 37 пайыз дайын болып шықты.
«ЖайықЖылуҚуат» мамандарының айтуынша, көпқабатты үйлерді жылыту маусымына дайындық кезінде басты кедергіні адамдардың өздері келтіреді. Біріншіден, өткен жылыту маусымының қарыздарын уақытылы төлемейді. Екіншіден, күндіз көбі жұмыста, кешкісін бәрін бір уақытта аралап шығу мүмкін емес. Ол аздай, көпқабатты тұрғын үйлердің көбінде пәтерді жалға алушылар тұрады. Оларды ұстауда, қарызды қайтаруда да қиындық бар.
Орал қаласындағы «Жайықжылуқуат» АҚ 1 667 нысанды жылу энергиясымен қамтамасыз етеді, оның ішінде 1 215 тұрғын үй, 42 балабақша, 85 оқу орны, 33 денсаулық сақтау нысаны, 5 әлеуметтік қорғау нысаны, 23 мәдениет нысаны бар, 268-і басқа ұйымдар. Биылғы жылы қаладағы жөндеу жұмыстары үшін 569,267 млн қаржы бөлінген.
Жанат ҚАЙЫРҒОЖИНА