«Қазақстан Барысы – 2024» атағын Абай ауданының палуаны Ерасыл Қажыбаев жеңіп алды. Шымкенттік Ерсұлтан Мұзаппаров екінші, Абай ауданынан келген Саят Шәмшиев үшінші орынды иеленді.
Ерасылға турнирдің бас жүлдесі 15 миллион теңге, алтын белбеу және тайтұяқ бұйырды. Жеңімпазға марапаттарды Қазақстан Республикасының Туризм және спорт министрі Ербол Мырзабосынов табыс етті.
Турнирдің жалпы жүлде қоры 27,1 миллион теңге болса, оның 3,72 миллионы жаттықтырушыларға бөлінген. Жүлде ақшасы келесідей бөлінді: 1 орынға – 15 000 000 теңге, 2 орынға – 3 300 000 теңге, 3 орынға – 1 080 000 теңге. Сонымен қатар кездесуде жеңіске жеткені үшін әр палуанға 100 000 теңге төленді.
Турнирге облыстық жарыстардың қорытындысы бойынша іріктеліп алынған еліміздің 42 үздік балуаны қатысты. Олар 17 облыс пен республикалық маңызы бар 3 қала – Астана, Алматы және Шымкент қалаларының атынан қатысты. Турнирге былтырғы жылғы чемпион «Қазақстан Барысы» мен «Әскер Барысы» командасының екі өкілі де қатысты.