ҚР Денсаулық сақтау министрі Ақмарал Әлназарова Үкімет отырысының қорытындысы бойынша, өткен баспасөз мәслихатында медицина қызметкерлерінің кәсіби жауапкершілігін сақтандыруға қатысты заңнаманың негізгі мәнін түсіндірді, – деп хабарлайды Aikyn.kz Үкіметтің баспасөз қызметіне сілтеме жасап.
Журналистер оған: «Жақында дәрігерлердің кәсіби қателіктері үшін жауапкершілікке қатысты заң қабылданып, күшіне енді. Енді пациенттердің денсаулығына зиян келтірген кезде дәрігерлер айыппұл төлейтін болады. Бұл қандай сома және ол іс жүзінде қалай жүзеге асырылады?», – деген сауал қойды.
Министр бұған дейін заңнамада медицина қызметкерлерінің кәсіби жауапкершілігін сақтандыру үшін ешқандай құрал көзделмегеніне тоқталды.
«Денсаулыққа зиян келтірген немесе денсаулығын нашарлатқан, науқастың мүгедектігіне немесе өліміне әкеп соқтырған дәлелденген медициналық қателік жағдайлары бұрын қылмыстық тәртіппен қаралған. Мұндай жағдайларда медицина қызметкері материалдық және моральдық залалды өзі төледі. Мемлекет басшысының тапсырмасы бойынша, Қазақстанда алғаш рет медицина қызметкерлерінің кәсіби жауапкершілігін сақтандыру институты енгізілді, ол осы оқиғаларды медициналық ұйымдар деңгейінде қарауға мүмкіндік береді. Үш деңгейлі жүйе енгізілуде: медициналық ұйым, Денсаулық сақтау басқармасы және Медициналық және фармацевтикалық бақылау комитеті деңгейінде. Егер денсаулыққа келтірілген зиян анықталса және пациент пен оның туыстары өтемді қабылдауға дайын болса, онда залал сақтандыру пулы есебінен өтеледі. Медициналық қызметкердің өзіне қаржылық жүктеме көзделмейді, оның барлығы жыл сайын барлық жұмыс беруші медициналық қызметкерлер үшін міндетті түрде төлейтін сақтандыру жарналары арқылы төленеді», – деп атап өтті Ақмарал Әлназарова.
Айта кетейік, жақында Қазақстанда медицина қызметкерлерінің кәсіби жауапкершілігін сақтандыруды енгізетін «ҚР кейбір заңнамалық актілеріне денсаулық сақтау мәселелері бойынша өзгерістер мен толықтырулар енгізу туралы» заңның нормалары күшіне енді.