Отырыстың ашылуында сөз алған Кеңес төрағасы, Мәжіліс депутаты Аманжол Әлтай Мемлекет басшысы Қасым-Жомарт Тоқаевтың ұлттық тәрбиеге ерекше көңіл бөліп отырғанын атап өтіп, бұл құндылықтардың қазіргі жаһандық процестер мен жаңа қоғамдастыққа ықпалын сөз етті.
«Мемлекет басшысы Қасым-Жомарт Тоқаев ұрпақ тәрбиесіне баса назар аударып келеді. Атырауда өткен Ұлттық құрылтайда Президентіміз жастардың рухани дамуын жоғары құндылық ретінде көретінін атап өтті. Өскелең ұрпақтың рухани сауатты, саналы әрі салауатты болуы – қоғамның басты мәселесі және бұл назардан тыс қалмауға тиіс. Қазіргідей жаһандану заманында жат құндылықтар мен кереғар идеологиялардың жастарға әсері айтарлықтай күшейіп келеді. Жастарымызға дұрыс бағыт-бағдар беру жолында ұлттық тәрбие, ұлттық құндылықтарды дәріптеу – аса маңызды міндет болып отыр», – деді Аманжол Әлтай.
Жиын барысында Мәдениет және ақпарат вице-министрі Айзада Құрманова ұлттық құндылықтарды насихаттау мақсатында елдің барлық өңірлерінде арнайы медиа жоспарлар әзірленгенін және түсіндіру жұмыстары жүргізілетінін атап өтті Бұл жұмыстарды жүзеге асыруға ел зиялылары мен қоғам белсенділері де атсалысуда. Министрлік бүгінгі ақпараттық күн тәртібін ұлттық құндылықтар негізінде құрып, оны әлеуметтік және дәстүрлі медиада кеңінен насихаттауға баса назар аударуда.
«Өздеріңіз білетіндей, қазір медиа саланың адамдардың көзқарастарына әсері мол. Осыған орай, министрлік еліміздің ақпараттық күн тәртібін ұлттық тәрбие мен салт-дәстүрді, ұлттық құндылықтарды ұрпақ санасына сіңірудің маңыздылығын ескере отырып жүргізуде. Бұл бағытта өңірлерде арнайы медиа жоспарлар әзірленіп, ақпараттық түсіндіру жұмыстарын жүргізетін сарапшы спикерлер пулы құрылды. Түрлі форматтағы материалдар дәстүрлі және әлеуметтік медиа желілерінде кеңінен таралуда. Республика театрларында да қазақ халқының мәдениеті мен ұлттық құндылықтарын насихаттайтын қойылымдар басымдыққа ие болып келеді», – деп мәлімдеді Айзада Құрманова.
Ал Оқу-ағарту вице-министрі Еділ Оспан отырыста биыл «Біртұтас тәрбие» бағдарламасы жаңартылып, оған 10 мемлекеттік органның күші біріктірілгенін айтты. Бұл бағдарлама арқылы балалар мен жасөспірімдерге ұлттық құндылықтарды жеткізу және тәрбиелеудің біртұтас идеологиялық жүйесін қалыптастыру көзделген.
– «Біртұтас тәрбие» бағдарламасы аясында «Балалар кітапханасы» жобасы іске асырылып, қазақ әдебиетінің әртүрлі кезеңдерін қамтитын 1770 кітаптың тізімі жасалды. Бұл жоба арқылы оқушылардың кітап оқу дағдыларын арттырып, қазақ әдебиеті мен мәдениетін жақын таныстыру көзделген. Тізімді дайындау барысында М.Әуезов атындағы Әдебиет институты, Ұлттық академиялық кітапхана және басқа да беделді ұйымдар жұмылдырылды, – деп атап өтті Еділ Оспан.
Жиын барысында айтыскер ақын Серікзат Дүйсенғазы қазақ тілінде мультфильмдердің жетіспеушілігіне назар аударып, қазақ фольклорындағы кейіпкерлерді балаларға насихаттаудың маңыздылығына тоқталды.
«Қазақша мультфильмдердің тапшылығы өзекті мәселе. Біздің халық ертегілер мен батырлар жырына бай, онда ұрпаққа үлгі боларлық ерекше кейіпкерлер жетерлік. Соған қарамастан, бүгінде қазақ ертегілеріндегі кейіпкерлерді насихаттайтын мультфильмдердің саны өте аз. Әсіресе, балалар қазақ тіліндегі контентке қарағанда басқа тілдегі мультфильмдерді көп көреді. Бұл жағдайды өзгерту үшін Мәдениет және ақпарат министрлігі мен Оқу-ағарту министрлігі бірігіп, мультфильмдер мен балаларға арналған контентке қолдау көрсетуді қолға алуға тиіс. Осы мәселені Үкіметке жеткізу керек деп санаймын», – деді Серікзат Дүйсенғазы.
Театр режиссері Асхат Маемиров болса, балаларға арналған шығармалар мен мультфильмдерді қолдау үшін арнайы гранттар бөлудің маңызды екенін атап өтті.
«Балаларға арналған шығармашылық жобалар мен мультфильмдерге, көркем фильмдерге арнайы гранттар бөлінсе, олардың ұлттық құндылықтарды насихаттаудағы рөлі арта түсер еді. Бұл жұмыстар тек Ақпарат және мәдениет министрлігінің құзыретіне ғана кірмей, Оқу-ағарту министрлігінің де тікелей жауапкершілігіне жүктелуі керек деп ойлаймын», – деді Асхат Маемиров.
Бұдан бөлек, жиын барысында жазушы, қоғам қайраткері Алдан Смайыл, ақын Оңайгүл Тұржан және жазушы-драматург Роза Мұқанова ұлттық тәрбие, оның ұрпақ санасына тигізер терең әсері жайында пікірлерін ортаға салды. Қатысушылар қоғамда тамыры тереңге жайылған дәстүрлі құндылықтарды ұлықтаудың маңыздылығын ерекше атап өтіп, ұрпақтар сабақтастығын сақтау жолында аянбай еңбек ету қажеттігіне тоқталды.
«Әр ұлттың рухани тірегі – өз тілі, өз мәдениеті. Құндылықтарымызды сақтап қалу болашаққа деген жауапкершіліктің белгісі. Ұлттық тәрбие тамыры тереңде жатқан мәдениетіміз бен әдебиетімізден сусындайды, ал оны сақтап, насихаттау – әрбіріміздің парызымыз», – деді Алдан Смайыл.
Жалпы, отырыс барысында ұлттық тәрбие мен құндылықтарды жас ұрпақтың бойына сіңіру, мәдениетті қолдау шараларын күшейту бағытында бірқатар ұсыныстар мен бастамалар талқыланды. Кеңесте көтерілген мәселелер ұлттық мәдениет пен тәрбиені нығайтудың маңыздылығын тағы бір айқындады.
Әсет САМАТҰЛЫ