Ол осы күнге дейін Астанадағы «Қазжол Астана» қонақүйінде және Delish кофеханасында тәтті тағамдар әзірлеп, тәжірибе жинақтаған. Бозбаланың бір күнде 200 круассан пісірген кезі де болыпты.
Нұржан – Жаңаөзен қаласының тумасы. 9-сыныпты бітірген соң Маңғыстау жастарына арналған «Жарқын Болашақ» бағдарламасының қатысушысы атанады. Кейін елордадағы Қоғамдық тамақтандыру және сервис колледжіне оқуа түсіп, кәсіби білімін жетілдірді. «Аспаз-кондитер» мамандығында оқитын жас өреннің «аспаздықты меңгерсем» деген ынтасы бала кезден басталып, білікті маман болуға жетеледі.
– Отбасында бес ағайындымыз. Үйдің тұңғышымын. Әкем мен анам күні бойы жұмыста болған соң үй шаруасына үлгере бермейтін. Балалардың үлкені болғандықтан анам маған жылдам дайындалатын тағамдарды әзірлеуді үйреткен еді. Одан кейін өзім де интернет ақтарып, түрлі тағамның дайындау тәсілін меңгере бастадым. Қазір 16 жастамын, – дейді студент.
Нұржан 9-сыныпты аяқтаған соң Жаңаөзен политехникалық колледжіне аспаз мамандығына құжат тапсырған. Алайда сол уақытта анасы мен туыс ағаларынан «Жарқын Болашақ» бағдарламасымен Астанаға тегін оқуға түсуге болатынын естіп, бағын сынап көруді шешкенін айтты.
– Әкем алғашында қарсы болды, бірақ анам мен ағаларым осы бағдарламаға тапсырып көруге кеңес берді. Бағдарлама ұйымдастырушыларынан толыққанды ақпарат алып, құжат тапсырып, грант иегері атанғанымды естіп қатты қуандым, – дейді ол.
Аспаздықты үйрену жолындағы ең есте қаларлық тәжірибесі ретінде Нұржан «Қазжол Астана» қонақүйінде көмекші болған кезін айтады. Ол қонақүй мейрамханасында бір күнде ең көп круассан дайындапты.
– Сабақтан тыс уақытта колледждегі кондитер цехына барып, тағамдарды әзірлеу барысын бақылаймын. Ал жазғы демалыста фаст-фуд өнімдерін дайындайтын дәмханада қызмет етіп, табыс таптым. Көпке танымал Delish кофеханасында бірнеше рет тәжірибеден өтіп, десерттерді безендіру тәсілін үйрендім. Ыстық цехта да машығымды шыңдадым, – деп жиған тәжірибесімен бөлісті студент.
Нұржанның Астанада аспаздық машығын шыңдап, танымал мамандардан тәжірибе алуына мүмкіндік берген – «Жарқын болашақ» бағдарламасы «ҚазМұнайГаз» бен Samruk-Kazyna Trust компаниялары. Жоба аясында Маңғыстау өңірінің 12-22 жас аралығындағы жастары еліміздің алдыңғы қатарлы білім ордаларында грантқа оқуға түсіп, арнайы шәкіртақыға ие бола алады.
Нұржан оқуын сәтті аяқтаған соң халықаралық деңгейдегі қонақүйлерде қызмет еткісі келеді.
– «Мишлен» жұлдызын иеленген аспаздарды үнемі қадағалап отырамын. Болашақта өзім де ерекше рецептер тауып, жаңа тағам түрін ойлап тапқым келеді. Француз аспазшысы Седрик Гроле сияқты бесжұлдызды қонақүйде қызмет етіп, кондитер үйін ашсам деген арманым бар, – деп сөзін түйіндеді болашақ аспаз.
С.БЕГІМБАЙ