Сонымен бірге облыс аумағында жаңа қала пайда болғанын да жұрт жақсы біледі. Бұған дейін Іле ауданы құрамындағы Жетіген ауылы болып келген елді мекен қазір «Алатау қаласы» деп аталады. Егер алдағы жылдарға жоспарланып, ойға алғандар жүзеге асса, Алатау Алматы мен Қонаев қалаларының арасындағы сәулетті де, дәулетті шаһарға айналады. Қазір жаңа әрі жас қаланы дамыту, көркейту мақсатында ірі-ірі жобалар, игілікті істер қолға алынған. Күні кеше қаладағы «Еңбек» ықшамауданында «Жайлы мектеп» жобасы аясында салынып жатқан мектеп қолданысқа беріліп, оқушыларын қабылдағанын да сол игі істер қатарына қосуға болады.
Көркі алыстан көз тартатын үш қабатты, 600 орынды білім ошағының ашылу салтанатына жұрт көп жиналды. Балалардың болашағын қамтамасыз етуге бағытталған шарапатты істің игілікке асуына куә болуға келгендер арасында Алматы облысы әкімінің бірінші орынбасары, өңірдің ел өнеге тұтатын құрметті азаматтары, ардагер ұстаздар мен ауыл тұрғындары болды.
Осылайша, Алматы облысының Алатау қаласында еліміздегі білім беру жүйесін дамыту арқылы үш ауысымды және апатты мектептер мәселесін түбегейлі шешу мақсатында Мемлекет басшысының тапсырмасымен жүзеге асырылып жатқан «Жайлы мектеп» ұлттық жобасы аясында жаңа мектеп салынды.
Алматы облысы әкімінің бірінші орынбасары Нұрлан Әбдірахымның айтуынша, дәл қазір облыстағы білім саласының басты проблемасы – үш ауысымды оқыту мен оқушыларға орын тапшылығы. Осынау жылдар бойы өзектілігімен ерекшеленіп келе жатқан мәселенің мәнісін табу мақсатында қолға алынған жұмыстар жетерлік. Соның ішінде «Жайлы мектеп» жобасының ықпалы мол болары сөзсіз.
«Өңірдегі өзекті проблеманың бірі болып отырған үш ауысымды және апатты мектептерден құтылып, оқушыларға орын жетіспеушілігі мәселесін шешу жолында нақты жұмыстар атқарылуда. Соның ішінде аталған проблеманы реттеуге «Жайлы мектеп» ұлттық жобасы өзіндік оң әсерін тигізіп отыр. Облыста биылдың өзінде аталған жоба бойынша 26, жеке инвесторлар көмегімен 4 және жергілікті бюджет қаржысына 2 мектеп салынып, қолданысқа беріледі деп жоспарланып, рет-ретімен жүзеге асырылуда. Бүгін, міне, сіздер де соның біріне куә болып отырсыздар. Болашақ жастарымызға жаһандану кезеңінде сапалы білім мен саналы рухани тәрбие беру маңызды. Ендігі кезекте облысымыздың дарынды балалар саны бүгін есігін айқара ашқан жаңа да жайлы мектепте білім алатын оқушылармен толығатынына сенімдімін. Келешегіне батыл болжам жасалып отырған Алатау қаласында алдағы кезде бұдан басқа да игілікті істер жүзеге асырылады», – деп атап өткен облыс әкімінің бірінші орынбасары алатаулықтарды арнайы құттықтады. Мектеп құрылысын жүргізген мердігер Бауыржан Сержанұлын, құрылыс жұмыстарының басшысы Ғалымжан Ниетбекұлы және жоба жетекшісі Ернар Жасұланұлын Алматы облысының әкімі атынан алғысхатпен марапаттады.
Жаңа мектепте сапалы білім алу үшін барлық жағдай қарастырылған. Білім ошағында соңғы үлгіде жабдықталған кабинеттер, ерекше балаларға арналған инклюзивті орталық, шеберхана, кітапхана, робототехника, STEM және модификациялық кабинеттер, асхана, спорт және мәжіліс залдары заман талабына сай жабдықталып, барлық керек-жарақпен қамтамасыз етілген.
Болат АБАҒАН,
Алматы облысы