Жиынның басты мақсаты – мемлекет пен қоғам алдында тұрған, ауыл халқын толғандырып отырған өзекті де өткір мәселелерді бірлесіп, ашық талқылау, олардың шешу жолдарын іздеу. Басқосуға «AMANAT» партиясы орталық аппарат басшысы Мади Оспанов, Парламент Мәжілісінің депутаты Болат Керімбек, Жетісу облысы әкімінің орынбасарлары Әлібек Жақанбаев және Диас Есдәулетов, басқарма басшылары мен облыстағы 113 ауылдық окургтің әкімдері қатысты. Алғаш ұйымдастырылған форум барысында партияның сайлауалды бағдарламасын жүзеге асыру, ауыл-аймақтың әлеуметтік-экономикалық дамуы, ауыл әкімдерінің сайлауы және олардың атқаратын жұмысының негізгі мәселелерін талқылауға арналған алаңға айналды.
Жетісу облысы әкімінің орынбасары Әлібек Жақанбаевтың айтуынша, қоғамдық-саяси тұрақтылықты және орнықты дамуды қамтамасыз ету – әкімдердің басты міндеті.
«Облыс экономикасын одан әрі дамыту және халықтың өмір сүруіне қолайлы жағдай жасау үшін бірлескен, тиімді жұмыстың арқасында облысымыздың әл-ауқатын жақсарту үшін алға қойылған мақсаттарға қол жеткізе алатынымызға сенімдімін», – деді ол.
«AMANAT» партиясының аппарат басшысы Мади Жарылқасынұлы жергілікті атқарушы биліктің жауапкершілігі жоғары болуға тиіс екенін айта келе, ауыл әкімдері институтының нәтижесі табысты реформаның маңызды міндеті болып табылатынына баса мән берді.
«Ауыл әкімдерінің форумы қазіргі уақытта еліміздің барлық аймағында өтіп жатыр. Форумда айтылған ұсыныстар мен идеялар, тың бастамалар «AMANAT» партиясы атынан сайланған ауыл әкімдерінің табанды жұмысы мен кәсіби шеберлігіне жаңа серпін береді деп есептеймін. Мемлекет басшысы Қасым-Жомарт Тоқаев ауыл әкімдерін тікелей сайлау жүйесін енгізгеннен бері, жыл сайын елді мекен басшыларына қатысты халық өз таңдауын жасап келеді. Өңірде 2021 жылдың шілдесінен бастап 113 ауыл әкімінің сайлауы өтті, оның ішінде партиядан ұсынылған 111 (98%) кандидат жеңіске жетті. Бұл – біздің бағдарламаларымыз бен бастамаларымызға халық сенетінінің айқын дәлелі», – деді аппарат басшысы.
«AMANAT» партиясы елді мекендердегі кәсіпкерлікті дамытуға, экономикалық ахуалды арттыруға баса назар аударуда. Дәл осы мақсатта форум барысында «Қарызсыз қоғам», «Құқықтық көмек» жобаларының және Жол картасы аясында жүзеге асып жатқан іс-шаралар мен жетістіктер талқыланды. Мәселен, «Қарызсыз қоғам» жобасын іске асыру масатында облыс орталығында жобалық кеңсе ашылып, биылдың 5 ақпанынан бастап Жетісу облысының барлық аудан, қалаларында 7 300 адам оқытылды. Ал Жетісу облысы бойынша биыл Жол картада айқындалған 94 іс-шараның 24%-ы орындалды. Атап айтар болсақ, биыл 349,3 мың шаршы метр тұрғын үй салуды жоспарланған, 8 айда 150,2 мың шаршы метр немесе 43% тұрғын үй пайдалануға берілді. Жыл соңына дейін 4 117 үй беріліп, тұрғын үй кезегі 14%-ға төмендейді. Облыста орталықтандырылған сумен қамту деңгейі – 91,1%. Облыстық деңгейдегі 182 шақырым және 54 елді мекеннің ішкі жолдары жөнделіп, Балқаш көліне дейінгі 132 шақырым жолдың 117 шақырымына асфальт төселді.
«Халықтың партия мен атқарушы билікке деген сенімі сайлауалды уәделердің орындалуымен тікелей байланысты. Оларды уақытылы және сапалы орындау – баршамыздың басты міндетіміз. Бүгінгі форумның ұйымдастырылуы біз үшін өте маңызды. Шалғайдағы ауыл әкімдерінің жұмысына әртүрлі бағыттар бойынша әдістемелік қолдау әрдайым қажет», – деді Панфилов ауданы Үлкенағаш ауылдық округінің әкімі Ермек Нұрахметов.
Форум аясында панелдік сессиялар ұйымдастырылды. Онда ауыл әкімдері «AMANAT» партиясының Сайлауалды бағдарламасын іске асыру, партиялық жобаларды ілгерілету, қызметті кәсібилендіруге негізделген мемлекеттік қызметтің жаңа принциптері мен қадамдарын, сыбайлас жемқорлықтың алдын алу, мемлекеттік сатып алуды іске асыру, агроөнеркәсіп кешеніндегі мемлекеттік қолдаудың қолжетімді тетіктерін қалыптастыру, кәсіпкерлікке қолдау көрсету және инвестиция тарту шаралары, қоғамдық-саяси ахуал және бұқарамен жұмыс істеу секілді түрлі бағыттарда арнайы мамандардан дәріс алды.