Aikyn.kz жасанды интеллектің адам сияқты ойлауға үйретілген буынының мүмкіндіктерін Quartz жариялаған хабарламаға сүйеніп талдайды.
OpenAI бас директоры Сэм Альтман: «Бұл модельдер көп ойлауды қажет ететін күрделі тапсырмаларды орындау үшін пайдаланылуы мүмкін». Фото techstartups.com сайтынан алынды
OpenAI өзінің алғашқы «ойлай» алатын моделін жасады. Жаңа модельдер o3 және o3-mini деп аталады. Модельдердің ешқайсысы әлі жаппай қолданысқа берілген жоқ. Қазір олардың қауіпсіздігі тексеріліп жатыр.
«Біз мұны ЖИ-дің дамуының келесі кезеңінің басы деп бағалаймыз. Бұл модельдер көп ойлауды қажет ететін күрделі тапсырмаларды орындау үшін пайдаланылуы мүмкін», – дейді OpenAI бас директоры Сэм Альтман.
Альтман жасанды интеллект стартапы o2 атауын қолданбайтынын мәлімдеді. Оның айтуынша, жасанды интеллект компаниясы «Telefonica-дағы достарымызға құрметпен қарайды және өзінің модельдеріне атаулар таңдауға келгенде OpenAI-дің қателесетін дәстүріне сай» o2 атауын қолданбайды. O2 – испандық Telefonica брендіне тиесілі Ұлыбританиядағы ұялы байланыс операторының атауы.
Қыркүйек айында іске қосылған o1-мен салыстырғанда o3 нұсқасы 23 пайызға ақылды. Фото linkedin.com сайтынан алынды. Авторлығы: Atul Y. аккаунты
Алғаш рет OpenAI сыртқы қауіпсіздік сынағы үшін жаңа моделін ашық тексеруге ұсынды. Модельдің қауіпсіздігін зерттеушілер онымен алдын ала танысып, сынау үшін тіркеле алады. ЖИ стартапы қаңтар айының соңында o3-mini, содан кейін толық o3 моделін жаппай қолданысқа шығармақшы.
Қыркүйек айында іске қосылған o1 және o1-mini-мен салыстырғанда, OpenAI-дің жеке SWE-Bench Verified бағалауында o3 нұсқасы o1-ден 23 пайызға асып түскен. Ал Codeforces рейтингі бойынша, 2 727 болып бағаланған.
Стартаптың мәліметінше, бұл рейтингте OpenAI-дің бас ғалымы (адам) 2 665 ұпай жинаған. Жаңа o3 моделі сонымен қатар EpochAI Frontier Math сынағы бойынша рекорд орнатқан. ARC-AGI сынағында o1 нұсқасынан үш есе көп ұпай жинаған.
OpenAI жақында өзінің o1 моделінің толық нұсқасын іске қосты. Стартап сонымен қатар ChatGPT Pro деп аталатын айына $200 тұратын жаңа жазылым енгізді. Жазылымда o1 pro режимі деп аталатын o1-дің жетілдірілген нұсқасы да қамтылған.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.