Кейінгі кездері қоғамдық резонанс тудырған маңызды мәселені арқау еткен жиынға қазақстандық және шетелдік белгілі психологтер, ғалымдар, сарапшылар, мемлекеттік органдар мен азаматтық қоғам өкілдері қатысты. Конференцияда көптің көкейіне сауал туғызған отбасылық зорлық-зомбылықтың өзекті мәселелері, оның шығу себептері мен салдары, сондай-ақ үрей тудырған фактілерді алдын алудың әдістері талқыланды. Халықаралық жиынның шымылдығын ашқан Қазақ ұлттық қыздар педагогикалық университетінің ректоры, Президент жанындағы Әйелдер істері мен отбасылық-демографиялық саясат жөніндегі Ұлттық комиссияның мүшесі Гүлмира Қанай биыл 50 жылдық мерейтойын атап өтетін психология кафедрасының іс-шараны университет қабырғасында өткізуінің өзіндік маңызы бар екенін жеткізді.
Жиын барысында Парламент депутаты Айна Мусралимова құттықтау сөзінде халыққа психологиялық көмек көрсету сапасын арттыру және психологтердің қызметін реттеу үшін заңнамалық база құру мәселесіне, оның ішінде ҚазҰҚПУ психология кафедрасы ғалымдарының қатысуымен жүргізіліп отырған жұмыстарға баса назар аударды.
Былтыр жыл соңында «Психологиялық қызметке көмектесу мен дамытуға» басымдық беру мәселесін көтерген «AMANAT» партиясы Әйелдер қанатының мұрындық болуымен өткен жиында халықаралық сарапшылар мен жетекші ғалымдар бүгінгінің өзекті ахуалына қатысты пікірін білдірді. Олардың қатарында Суат Кылычарслан (Түркия), Котра Кришна Мохан (Қазақстан), Татьяна Листопад (Эстония) және тағы басқа шетелдік өкілдер бар. Эстониялық Татьяна Листопад өз сөзінде Еуропадағы отбасылық зорлық-зомбылықты болдырмау бағдарламаларын іске асыру туралы тәжірибесін бөліссе, Түркия мемлекетінің өкілі Суат Кылычарслан отбасы психологиясы саласындағы көпжылдық зерттеулеріне сүйене отырып, отбасылық зорлық-зомбылықпен күресудің заманауи бағыттарын ұсынды.
Одан өзге, Ұлттық ғылым академиясының академигі Зарема Шәукенова оқу ордасынан тәлім алған студенттерді білім нәрімен сусындатып, университеттің дамуына жылдар бойы сүбелі үлес қосып келе жатқан психология кафедрасы ұжымын мерейтойымен құттықтады. Ол кафедраның жартығасырлық жолы – оқытушылар мен ғалымдардың еселі еңбегінің жемісі екенін атап өтті.
– Бүгінде «Психология» саласы – қоғам үшін аса маңызды және өзекті мамандық. Әсіресе, білікті мамандарды даярлау қазір ерекше рөлге ие. Былтыр «АMANAT» партиясы халыққа психологиялық көмек көрсетудің тиімді институтын құру мәселесіне ерекше назар аударды. Жыл бойы Қазақ ұлттық қыздар педагогикалық университеті психология кафедрасының қолдауымен осы бағытта белсенді жұмыс жүргізіліп келеді. Ал университет қабырғасында өтіп жатқан халықаралық ғылыми-тәжірибелік конференцияға Эстония, Қырғызстан және Түркиядан келген спикерлер қатысып отыр. Жоғарыда аталған мамандардың бала тәрбиесі мен ата-аналармен жұмыс істеу саласында тәжірибесі мол. Олар жиында өз тәжірибелерімен бөлісіп, пікір алмасуда. Онымен қоса, конференцияға студенттер де қатысты. Бұл іс-шара білім алушылар үшін пайдалы ақпаратқа толы әрі болашақта іс жүзінде қолдануға қажетті тәжірибе береді, – деді Ұлттық ғылым академиясының академигі, профессор Зарема Каукенқызы.
Жарты ғасыр уақыт аралығында кафедраның еліміздегі отбасы психологиясын дамытуға іс жүзінде елеулі үлес қосқанын айтқан университет профессоры, психология ғылымдарының докторы Хорлан Шерьязданқызы оқу ордасының бірқатар жетістігін де тізіп өтті.
– Психология кафедрасында қызмет етіп келе жатқаныма 45 жыл уақыт өтті. Иә, бұл кафедрада менің бүкіл өмірім өтті. Психология мамандығы университеттің білім беру жүйесіне 1997 жылы қосылды. Сол уақыттан бері біз мемлекетіміз үшін жоғары білікті психолог мамандарын даярлауды бастадық. Психология мамандарының өз кәсібіне деген сүйіспеншілігін арттыруға, еліміз үшін жоғары дәрежелі мамандарды даярлауға өз үлесімізді қостық. Мен психология кафедрасының 50 жыл ішінде үлкен жетістіктерге жеткенін ерекше атап өткім келеді. Осы уақыт аралығында біздің кафедра маңызды істер атқарды. Біз көптеген мемлекеттік жобаға қатысып, оларды білім беру жүйесіне енгіздік. Мұндай жетістіктеріміз – кафедраның кәсіби шеберлігі мен ұжымдық еңбегінің нәтижесі деп білемін, – деді Хорлан Тоқтамысқызы.
Ұйымдастырушылардың сөзінше, аталған іс-шара отбасылық зорлық-зомбылық мәселесін теориялық тұрғыдан талқылап қана қоймай, мәселені шешудің заманауи әдістерін тәжірибелік деңгейде қарастыруға бағытталған. Сондықтан конференция халықаралық тәжірибе алмасу мен қауіпсіз орта құру үшін маңызды платформа саналады. Естеріңізге салсақ, биыл 16 маусымда әйел құқығы мен балалардың қауіпсіздігін қамтамасыз ету мәселелері жөніндегі жаңа заң күшіне енген еді. Ресми құжаттың заң жүзінде іске асырылуы – отбасы институтын нығайту мен тұрмыстық зорлық-зомбылықтың алдын алудағы маңызды қадам.
Алтынай БАУЫРЖАНҚЫЗЫ,
Алматы қаласы