Алматыда Қазақстан халқының бірлігі күніне арналған «Достық дастарқаны» атты ұлттық тағамдар фестивалі өтті. Шараны Қазақстан халқы ассамблеясы аясында Қазақстан Президенті жанындағы «Қоғамдық келісім» РМК, Алматы қаласы «Қоғамдық келісім» КМК, республикалық және қалалық этномәдени бірлестіктері ұйымдастырды. Фестиваль әртүрлі этностардың ұлттық тағамдарымен танысу арқылы төзімділік пен мәдениетаралық түсіністікті нығайтуды көздейді.
Бұл жастарды этностардың тамақтану мәдениетімен және қонақжайлылығымен таныстырудың зор мүмкіндігі. Жоба барлығын бір істің аясында біріктіруге және түрлі мәдениет қырларын ашуға септігін тигізеді деген үміт бар.
«Достық дастарқаны» фестиваліне Қазақстан халқы ассамблеясы төрағасының орынбасары – Хатшылық меңгерушісі Жансейіт Түймебаев бастаған Парламент Мәжілісінің, Алматы қалалық мәслихатының депутаттары, зиялы қауым мен этномәдени бірлестіктердің өкілдері қатысты.
– Ассамблея аясында қазақтың қасиетті жерінде, Ұлы даласында дәулетін жинап, ұрпағын жайған 130-дан астам ұлт пен ұлыстың басын бірлікке топтастырып, бүгінгі өзара түсіністік пен құрмет сезімнің, жарастық пен келісімнің, ұлтаралық татулықтың тұрақтылығын одан ары жарастыра нығайтуда Қазақстан халқы ассамблеясы жұмысын мақтаныш пен қуанышпен айта аламын. Ассамблея аясында түрік диаспорасы мәртебелі қазақ халқының мәдени-рухани құндылығына жақындасып, достық пен ынтымақта бірге болып, қуанышы мен күйінішін бөлісіп, еліміздің экономикасын дамытуда, мәдениетін гүлдендіруде, жас қазақ мемлекетінің тәуелсіздігін нығайтуға атсалысып келеміз, – дейді Қазақстан халқы ассамблеясының мүшесі Қазақбай Таштемірұлы.
Оның айтуынша, Қазақстан халқы ассамблеясы – достық пен ынтымақтың, келісімнің киелі бесігі, сыйластықты көрсетудегі бейбіт өміріміздің белгісі. «Мемлекетіміздегі кез келген халық Ассамблея аясында терезесі тең, керегесі кең екенін көрсетіп отыр. Бұл – Елбасы Нұрсұлтан Назарбаевтың ұлтаралық мәселелерді шешудегі көрегендігі мен даналығы. Осындай игі іс ұрпақ сабақтастығында жалғасын табады деп ойлаймын», – деді ол.
Шараға жиналғандар түрлі ұлттың дастарқанынан дәм татып, өнерпаздардың талантына тәнті болды.