Бүгіннен бастап Қазақстан президенттігіне кандидат Қасым-Жомарт Тоқаевтың Түркістан облыстық қоғамдық штабы құрылды. Облыстық қоғамдық штабты бесінші шақырылымдағы Мәжіліс депутаты, облыс әкімінің орынбасары қызметтерін атқарған Ұласбек Сәдібеков басқарады.
Nur Otan партиясы Түркістан облыстық филиалында өткен брифингте Ұласбек Сәдібекұлы штабтың алдағы жұмыстары мен құрамы жайында жан-жақты айтып өтті.Облыстық қоғамдық штаб 65 адамнан тұрады. Оның құрамында танымал тұлғалар, қоғам қайраткерлері, партия белсенділері, зиялы қауым өкілдері, облыстық филиал саяси кеңесінің мүшелері мен жастар ұйымдарының белсенділері бар. Сондай-ақ өткен сайлау науқанына қатысып, мол тәжірибе жинақтаған азаматтар, үкіметтік емес ұйым өкілдері де молынан қамтылды. Бүгінгі күні облыстық және аудандық, қалалық 17 штаб жасақталып, құрамына 573 адам енген.
Облыстық, аудандық, қалалық қоғамдық штабтар аппаратының құрылымы жасақталған. Штабта ұйымдастыру, саяси, қоғамдық қабылдау заңгерлік бөлімдері мен баспасөз-қызметі жұмыс істейді.
Зиялы қауым өкілдерімен, ақсақалдармен, әлеуметтік сала қызметкерлерімен, еңбек ұжымдарымен, кәсіпкерлермен, ауылшаруашылық саласы мамандарымен, шалғай ауыл тұрғындарымен, үкіметтік емес ұйымдармен, құрылысшылармен, білім, мәдениет, спорт, денсаулық сақтау саласының және өзге де санаттағы азаматтармен еркін форматтағы кездесулерді көбірек өткізуге көңіл бөліп отырмыз, – деді облыстық штаб төрағасы Ұласбек Сәдібеков.
Кандидаттың бағдарламасын сайлаушыларға толыққанды жеткізуді мақсат еткен штаб мүшелері облыстық желілік кесте әзірлеп, ол бойынша сайлаушылардың басым бөлігін қамтуды жоспарлап отыр. Мұндағы мақсат – сайлауалды бағдарламаны халықтың жүрегіне жеткізіп, жан-жақты насихаттау.
Nur Otan партиясы төрағасының Бірінші орынбасары, Республикалық қоғамдық штаб төрағасы Мәулен Әшімбаев басқарып келетін штаб мүшелері құрамында Парламент Сенаты мен Мәжіліс депутаттары және есімдері елге танымал азаматтар бар.
Әділ сайлау – әділеттің нышаны. Сондықтан да, біздің мақсат – Nur Otan партиясының XIX съезі шешімдерін сайлаушыларға кеңінен түсіндіріп, басты жетістігіміз Тәуелсіздікті ту ете отырып, сайлау заңнамасын сақтау арқылы сайлаудың сапалы әрі демократиялық жолмен әділ, ашық түрде өтуін қамтамасыз ету, – деді Ұласбек Сәдібекұлы.
Түркістан облысы