Жаңа заман: жаңа технологиялық толқын... индустриалды-инновациялық даму... Біз осыны жете түсініп отырмыз ба?.. ХХІ ғасырда мүлдем жаңа тұрпатты ұлт болу қолымыздан келе ме? Сапалық өзгеріс үшін бірінші кезекте не қажет?
Шын ниеттенсек, біздің қолымыздан да бірдеңе келеді.
Бірақ біз негізінен алғанда алдымен сөзге мықтымыз! Ұлттың дамуы озық техника мен технологияны терең меңгеруге тікелей тірелген уақыт қазір. Бір кезде «Білім және еңбек» дейтін керемет журнал болды: қазақтың жаңа технологияны меңгеруге деген құлшынысын оятқан басылым еді, нағыз осы күннің журналы болуы тиіс-тін, түрлі желеумен жабылып тынды... Алдағы заман – жоғары технологияда, оны игеру мен меңгеруде тұр. Біз техникасы мен технологиясы барынша дамыған ел болсақ қана өз рухани байлығымызды әлемге таныта аламыз, мойындата аламыз. Қайыршылық жағынан алдына қара салмайтын Үндістан қазір қандай? Бұл елдің мамандары дүниежүзіндегі компьютер бағдарламасының жартысынан астамын жасаумен танымал. Олар осындай дәрежеге қалай жетті?
Біз құсап қызыл сөздің көбігін сапырып отырған жоқ: бұл елде бос сөз сөйлеуге орын да, уақыт та тапшы, қалайда жан бағу, күн көру, өмір сүру керек. Жалған кісілікке салынса, көпірме сөз айтып отырса, аштан өледі...
«Біздің мақсат – жаһандық технологиялық төңкерістің бөлшегіне айналу. Бұл мақсатқа жету үшін біз барынша еңбектеніп, елеулі үлес қосуға тырысамыз» дейміз. Бәсекеге қабілетті дамыған мемлекет болу үшін жоғары сауатты елге айналу аздық етеді. Әдеттегіден көп еңбектену қажет. Қазіргі әлемде жаппай сауаттылықтың өзі жеткіліксіз болып қалды. Мықты ұлт болу үшін орындаушылық тәртіп пен ең озық жабдықтармен және ең заманауи өндірістерде жұмыс істеу машығын меңгеруге дайын болу керек. Жоғары технологияның соңына жаппай түсу дегенді қаперінде ұстап отырған кім бар?
Біз қайда барсақ та кешігіп жүреміз. Үнемі кешігу кежегеден тарту дағдысын тудырады. Әрбір кешіккен сағатымыз бен күніміз күнделікті өмірде біліне бермеуі де мүмкін. Ғасырлық өлшеммен алғанда, бізді ондаған жылға артқа лақтырып тастайды. Қазақстандағы енді жетіліп, дұрыс жолға түсе бастаған индустриалды-инновациялық тұрғыдан даму
жолы – ең дұрыс жол. Технологиялық революцияның жаңа толқынының туындауына дайындығымыз қандай? Қоғамды жаңа дәуірлік өзгерістерге бейімдеуші халықты ақпараттандыру ісінің жетілуіне қандай үлес қоса аламыз? Жеткіншек ұрпақтың функционалды сауаттылығына мән берген дұрыс та шығар. Алайда қазіргі заманға бейімделген, машықтанған жас толқын қуатты болуы тиіс. Олардың белгілі бір істі бітіруге деген құлшыныс-қабілетін қайтсек арттыра аламыз?
Біздің сөзіміз – көп, ісіміз – аз. Осы екеуінің орнын ауыстыра аламыз ба?