Аламаны елді елеңдетіп, жыл сайын қазақ күресінің миллиондаған жанкүйерінің делебесін қоздырып, осынау белдесу түрін таңдаған мықтылардың намысын қайрайтын «Қазақ барысы» республикалық турниріне аймақтардан қатысатындарды іріктеу бәсекелі болып тұр. Қазақстанның Тұңғыш Президенті Нұрсұлтан Назарбаевтың жүлдесі жолындағы ақтық сынға қатысу құрметіне ие болу жолындағы жарыстарда жасындай жарқылдап, арыстандай арпалысқан апайтөс жігіттердің Жетісу жеріндегі сынағы да шиеленістігімен жұрт жадында қалды. «Жетісу бөрісі» атанып, облыс атынан «Қазақстан барысы» турнирінде өнер көрсету үшін болған бозкілем үстіндегі жан алып, жан беріскен белдесулерге 40 балуан қатысты. Аудан, қалалардағы жарыстарда оза шапқан жігіттердің осалы болмады.
«Жастар» спорт сарайында жалауын көтерген жарысты Алматы облыстық дене шынықтыру және спорт басқармасының басшысы Нұрбақыт Теңізбаев ашып, ел есімін жатқа білетін Әлімғазы Райымбеков атамыз ақ батасын берді жұлқынып тұрған жүйріктерге.
Жеребе қорытындысы бойынша екі топқа бөлініп белдескендер арасынан көзге шалынғандар жанкүйерлерінің қолдап-қолпаштауына арқаланып, әрбір белдесуді өзгеше өткізуге тырысты. Шын мықты қарсылас шыдатпайды екен. Өз топтарында қара үзген, қарсылас шақ келтірмеген кербұлақтық Мұхит Қойшыман мен алакөлдік Ернар Қабдолдаев жартылай финалға шықты. Осы белдесудің нәтижесі финалға жол ашып қана қоймай, «Қазақстан барысына» жолдама беретінін ескерген жігіттер шешуші айқаста сақтыққа салынып, асықпай күресті. Қара күшке емес, айла-тәсілге баса назар аударған Ернар ақыры қарсыласын қапы қалдырды. Кезек-кезек ұпайлар алмасып отырған белдесудің қорытындысында қарсыласын қапы қалдырды.
Екінші топтан озық шыққан талдықорғандық Жәнібек Дүйсенбаев пен текелілік Нұрсұлтан Аманжол арасындағы тайталаста Жәнібектің айы оңынан туып, жеңіске жетті.
Осылайша, екі топтан суырылып алға шыққан Ернар мен Жәнібек ақтық айқас барысында бозкілемнің үстінде қазақ күресінің небір айла-тәсілдерін паш етті. Алғашқы сәттерде алыптар тайталасында кімнің асығы алшысынан түсері белгісіз еді. Нағыз мықтылар белдесуінің негізгі кезеңі тең жағдайдағы тайталаста өтті. Дегенмен өзін аса сақ ұстап, ретсіз қимылдарға жол бермеуге барын салып, оңтайлы сәтті сабырмен күткен Ернар соңғы сәтте шалт қимылдап, тамаша әдіспен таза жеңіске жетті. Алакөлдік арда азамат бұған дейінгі жарыстардағы өкінішінің орнын толтырды. Биылғы «Жетісу бөрісі» атағын иеленді. Оған қоса чемпионға арналған алтын белбеуді беліне тағынып, темір тұлпардың кілтін алды. Екінші орынға ие болған Жәнібек Дүйсенбаевқа 1 миллион теңгенің сертификаты тапсырылды. Үшінші орын үшін болған белдесуде Мұхит Қойшыманнан басым түскен Нұрсұлтан Аманжолдың бағы жанды және
500 мың теңгелік сертификатқа ие болды.
Елордада өтетін «Қазақстан барысы» турнирінде Алматы облысының атынан Ернар Қабдолданов пен Жәнібек Дүйсенбаев сынға түсетін болды.
Болат АБАҒАН,
Алматы облысы