Мәжіліс төрағасы Нұрлан Нығматулин Бішкекте өткен ҰҚШҰ Парламенттік ассамблеясы Кеңесінің көшпелі отырысында сөз сөйледі. Қырғыз Республикасының астанасына ұйымға мүше мемлекеттер – Қазақстан, Армения, Беларусь, Қырғызстан, Ресей және Тәжікстан парламенттерінің, сондай-ақ ҰҚШҰ ПА-да бақылаушы мәртебесіне ие Ауғанстан мен Сербия елдерінің өкілдері жиналды.
Жиынға қатысушылар ұйымның қызметіне қатысты мәселелерді, аймақтық қауіпсіздік саласындағы ахуалды талқылап, алдағы іс-қимыл жоспарларын түзді.
Нұрлан Нығматулин еліміздің бейбітшілік пен қауіпсіздікті ілгерілету ісіндегі бастамаларына екпін түсіре келе, бұл саладағы Елбасы Нұрсұлтан Назарбаевтың ерекше рөлін атап өтті. Мәжіліс спикерінің пікірінше, қауіпсіздікті нығайтуға парламенттік дипломатия үлкен үлес қосуда. Ол парламентшілердің тиімді ықпалдастығының басты факторы ретінде заңнамалық базаны жетілдіруге назар аудартты.
Нұрлан Зайроллаұлы 23-24 қыркүйекте Нұр-Сұлтан қаласында, «Үлкен Еуразия: Диалог. Сенім. Әріптестік» тақырыбында өтетін Еуропа мен Азия елдері парламенттері спикерлерінің IV кеңесі бүкіл еуразиялық кеңістіктің игілігі мен тұрақты дамуы үшін көп қырлы ынтымақтастықтың өзекті мәселелері бойынша өнімді пікір алмасуға септесеріне сенім білдірді.
– Аталған форум Қазақстанның Тұңғыш Президенті Н.Назарбаевтың еуразиялық идеясының 25 жылдығына арналған. «Еуразиялық интеграция» идеясын Нұрсұлтан Әбішұлы алғаш рет 1994 жылы ММУ қабырғасында жариялаған болатын, – деп еске салды ол.
Отырыста ҰҚШҰ Парламенттік ассамблеясының Кеңесі осы ұйымның халықаралық ынтымақтастық және саяси мәселелер жөніндегі тұрақты комиссиясы төрағасының және төраға орынбасарының кандидатурасын бекіт
ті.
Қатысушылар 2019 жылы ҰҚШҰ-ға Қырғызстанның төрағалығының басымдықтарын жүзеге асыру туралы ақпаратты тыңдады. Сонымен бірге, Кеңес ЕҚЫҰ ПА-ның биылғы 5-9 шілдеде Люксембургте ұйымдастырылатын кезекті жазғы сессиясына ҰҚШҰ мемлекеттерінің парламенттік делегацияларының қатысуы бойынша міндеттерді анықтады. Сондай-ақ 2019 жылға арналған жұмыс жоспарлары пысықталды.
Мәжіліс төрағасы ҰҚШҰ-ға кіретін елдердің парламент өкілдерімен бірқатар екіжақты кездесулер өткізді. Армения, Беларусь, Ресейден келген әріптестерімен жүздесулерде бейбітшілік пен қауіпсіздікті нығайту мақсатында ұйым аясында ынтымақтастық және болашақ жоспарлар әңгіме өзегіне айналды.
Нұрлан Нығматулин Армения Ұлттық жиналысының төрағасы Арарат Мирзоянмен парламентаралық диалогты белсенді дамытуға уағдаласты. Ал қазақ-армян қатынастары туралы сөз еткенде, Мәжіліс басшысы осы жылы Армения төрағалық ететін ЕАЭО әлеуетін пайдаланудың маңызын қадап айтты. Армения тарапы елордамызда өтетін маңызды парламенттік форумға қатысатындарын растады.
Беларусь Ұлттық жиналысының Өкілдер палатасының төрағасы Владимир Андрейченкомен жүздесуде тараптар өзара түсіністік пен достыққа негізделген екіжақты қарым-қатынастардың қарқынды дамып келе жатқанын тілге тиек етті. Бұл ретте Беларусь Парламенті палатасының төрағасы шағын және орта бизнес, МЖӘ, цифрландыру және басқа да салаларды өркендету мәселелері бойынша Елбасы бастамаларын жүзеге асырудағы еліміздің жетістіктерін атап өтті.
Н.Нығматулин мен Ресей МемДумасының спикері Вячеслав Володин өзара келіссөздер барысында алдағы парламенттік форумға дайындық барысын талқыға салды. Мәжіліс төрағасы хабарлағандай, қазірдің өзінде 48 мемлекет қатысатынын растаған. Оның ішінде, 40-ынан парламент басшылары келеді. Бұған қоса, 16 халықаралық және парламенттік ұйымдар жетекшілері атсалысады.
Мемлекеттік Дума басшысы Қазақстан астанасындағы парламенттік жиынға ынта-ықылас білдіруші елдің көптігіне назар аудартты. В.Володиннің байламынша, бұл осындай форматтың бүгінде тиімді екенін және мәселелерді парламент спикерлері деңгейінде талқылаудың танымал болып отырғанын көрсетеді.