Мемлекеттік қызметке жастардың жаңа толқыны келе бастады. Қазақстан Президенті Қасым-Жомарт Тоқаев ұлықтау рәсімінде жастарға көбірек иек артатынын мәлімдеген еді. «Сөз бергеннен, іс атқарған қайырлы» деген ұстанымды ұстанған Мемлекет басшысы 300 адамнан тұратын кадрлар резервін қалыптастыратынын мәлімдеген болатын. Мұның бәрі – қазақтың «Жас келсе – іске» деген даналық өлшеміне сай әрекет.
Меритократия деген бар. Бұл ұғым сөзбе-сөз алғанда «лайықтылар билігі»дегенді білдіреді. Латынша meritus – лайықты және көне грекше κράτος – билік, басқару. Әлеуметтік шығу тегіне және қаржылық ауқаттылығына қарамастан тәуелсіз, басқарушы лауазымдарды ең қабілетті адамдардың иеленуін ортаға қоятын басқару қағидасы. Бірінші мағынасы лайықты басқарушылардың тағайындалуын жүзеге асыратын жүйе дегенді меңзейді. Кеңірек тараған екінші мағынасы дарынды және еңбекқор адамдарға еркін бәсекелестік жағдайында жоғары қоғамдық мәртебеге иеленуге мүмкіншілік беретін алғышарттарды аңғартады.
Меритократия ұғымын 1958 жылы М.Янг енгізген екен. Америкалық әлеуметтанушы Д.Беллдің «Постиндустриалды қоғамның қалыптасуы» еңбегі жарық көргеннен кейін (1973) «меритократия» ұғымымен бюрократия мен технократияны жоюға септігін тигізетін қоғамды басқарудың жаңа принципі атала бастаған.
Меритократиялық қоғам қазақша топшыласақ, «Әркімге – еңбегіне қарай» дейтін қағидатқа арқа сүйейді. Қоғамда әлеуметтік әділдік болуы керек. Қазақстан халқы ассамблеясы кеңесінің отырысында Әділ Ахметов «Меритократия – қадір-қасиет деген ұғымды білдіреді» деген сөз айтты. Осы жиында Мәжілістің вице-спикері Владимир Божко: «Біз ассамблеяның жұмысына қазақ зиялыларын, қазақ жастарын тартуымыз керек. Бірлік пен келісімді ту етіп келеміз. Мемлекетті құраушы ұлт (қазақ деп түсініңіз) екенін дұрыс түсініп отырмыз. Соңғы оқиғаларды сараптай отырып, жастарды, қазақ зиялыларын белсенді түрде Қазақстан халқы ассамблеясының жұмысына жұмылдыруға тиіспіз. «Қазақстанның 100 жаңа есіміне» енген мықты азаматтар баршылық. Жетістікке жеткен азаматтарды ассамблеяның жұмысына араластыру керек. Біз қазақ тілін үйрету жұмысын күшейтуіміз керек. Әсіресе, жастар арасында. Қазақ тілін білетін жастар флагман, үлгі болып, осы бағытта жұмыс жүргізуіміз керек. Қазақ тілі – мемлекеттік тіл. Біздің бәріміз қазақ тілінің әлеуметтік, экономикалық лифтке айналғанын түсінуіміз керек», – деді.
Қазір елмен сөйлесе алатын, елге сөзі өтетін қадір-қасиетке ие адамдардың жаңа шоғыры шығуы тиіс. Жағдай өзгерді. Қоғамдық сана өзгерді. Қазақ тілі әлеуметтік, саяси және экономикалық категорияға айналды. Осындай жағдайда атқарушы билікте ұлтын сүйетін, адал, әділ азаматтар іріктеліп шықса ғана біздің көшіміз оңға басады. Осыны мықтап ескеруіміз қажет.