Қазір демалыс мезгілі. Миды айналдырған аптап ыстықтан қашқан жұрттың салқын суды іздейтіні белгілі. Осындайда елдің есіне айдынды Алакөл, буырқанған Балқаш, шолпылдаған Шортанды, майдақоңыр Марқакөл, зерделі Зеренді дегендей, Қазақстандағы ертеден мәлім көлдер оралатыны, бәрінің де мүмкіндік тауып, сонда барғысы келетіні тағы анық. Соңғы жылдары шетелге сандала бермей, туған жердегі туризмді дамытқысы келетіндер тобы тағы бар.
Осы аталған жердің бәріне жету де қиын, кету де қиын.
Ең басты мәселе – жол. Жұрттың бәрінің ұшақпен баруға мүмкіндігі келмейді. Билет те табыла бермейді. Ең ыңғайлы көлік – теміржол. Жаз кезінде пойызға билет табу – мұхит түбіндегі маржан тасты іздегеннен де қиын. Автобус пен автокөлік арқылы жету – нағыз қайтпас қайсарлардың қолынан келетін іс.
Шілденің басында Зерендіге барғанбыз. Шортанды мен Зеренді арасындағы жол адамның зықысын шығарып жіберген. Тамыздың басында осы жолдың жөндеуі бітеді екен деген хабар алып жатырмыз. Бұл да жақсы.
Ал Алакөлге бару – бір азап. Соңғы 15-20 жылда Алматы және Шығыс Қазақстан облыстарының бюджетінен 50 миллиард теңге Алакөлдің инфрақұрылымын дамытуға құйылған екен. Былтыр Қазақстанның Тұңғыш Президенті – Елбасы Алакөлдің Алматы облысы жағындағы демалыс орындарын аралап, Қазақстанның туризм саласын одан ары дамыту үшін орталық мемлекеттік және жергілікті атқарушы органдарға бірқатар нақты тапсырма берген болатын. «Алакөл Қазақстан бойынша ең көп демалушы баратын жерге айналуы керек. Ол ыңғайлы жерде орналасуымен ерекшеленіп, барлық өңірдің тұрғындары үшін қолжетімді болып отыр. Көлдің бірегейлігі суының емдік қасиетіне байланысты. Оның құрамында радон, сілті және басқа да пайдалы элементтер бар. Осыған байланысты Алакөл еліміздің туризм саласы үшін өте маңызды».
Президент Қасым-Жомарт Тоқаев та бұл мәселені назардан тыс қалдырмады. «Былтыр көптеген қазақстандық Алакөлде демалуды жөн көрген болатын. Алайда сервистік жұмыстардың тиісті деңгейде жүргізілмеуі қолбайлау болды. Атап айтқанда, автожолдардың сапасы қынжылтады. Осыған орай Шығыс Қазақстан және Алматы облыстарының әкімдеріне қойылар талап: қысқа мерзімде жолдарды жөндеп, сервистің деңгейін көтеру қажет», – деген тапсырма берді.
Шығыс Қазақстан облысы бойынша Алакөл туризмін дамыту үшін алдағы үш-төрт жылда бюджеттен қосымша 30 миллиард теңге қаржы бөлінетін көрінеді. Былай алып қарасақ, мемлекет қаржы бөлмей жатқан жоқ. Бірақ сол қаражаттың қайтарымы оңбай тұр. Ел ішіндегі автожолдардың ескісін жөндеп, жаңасын осы заманғы талаптарға сай салудың қандай қиындығы бар?
«Жеткенше бір қиналасың, кеткенде тағы қиналасың» дейді жұртшылық. Қалың ел қашанғы жол азабын тарта береді? Осы сұрақтың жауабы табыла ма, жоқ па?