Алматыда медицина ғылымдарының кандидаты, академик Қайрат Айдарханұлының «Қазақ емшілігі» атты екі томдық кітабы мен «Қазақ емшілігі энциклопедиясының» тұсаукесері өтті. 1979 жылдан бері медицина саласында еңбек етіп келе жатқан, талай жыл хирург болып жұмыс істеп, кейінгі жылдары ғұмырын бірыңғай қазақ емшілігіне арнаған жанның құнды еңбектері енді көпшілік үшін қолжетімді өнімге айналды.
Ұзақ жыл медицинада табанды еңбек еткен білікті дәрігер 39 жылдық қызметі барысында 17 мыңнан аса адамға операция жасаған. Осынау ерен еңбегі бағаланып, Мемлекеттік сыйлықты да иеленген. Қайрат Айдарханұлының есімі 1998 жылы Қытай елінің аз ұлттар өкілінің әйгілі адамдар топтамасы кітабына алғашқылардың бірі болып енді.
Қытайдың Алтай аймағында дүниеге келген ғалым қазір елордадағы «Шипалы» емдеу орталығын басқарып отыр. Қаншама қызметтің өткелегінен өтсе де, өзінің ғалымдық, зерттеушілік қырын әркез жетілдірумен, дамытумен келе жатқан жан. Соның арқасында жалпы қазаққа аса қажетті ерекше еңбектерді жазып шыққан. Тұсаукесер рәсімін белгілі жазушы Жәди Шәкенұлы ашып, алғысөзін арнады.
– Талай жылғы ғұмырында жиып-терген дерегі мен тәжірибесін бүгін еліне енші, халқына байғазы етіп үлкен кітап ретінде ұсынып отыр. Сөзсіз, бұл – үлкен қазына. Еңбек ете жүріп соның бәрін қағазға тізіп отыру, әрбір деректі мұқият жинастыру, оны асқан ыждахаттылықпен кітапқа айналдыру, расында, үлкен шаруа. Біз бүгін сол еңбектің жемісін көріп, шын қуанып отырмыз. Ендігі ретте бұл кітаптар ел игілігіне айналары күмәнсіз, – деп атап өтті ол.
Автордың айтуынша, жарық көріп отырған кітаптар ішінен қаншама ауруға дауа болатын ем-дом рет-ретімен, анық әрі ықшам етіп көрсетілген. Осының бәрі халықтың қажетіне жарап жатса, онда еңбегімнің ақталғаны дейді.
– Қазақтың емшілік дәстүрі сонау ғасырлардан бері жалғасып келе жатыр. Мен де осы салаға көңіл бөліп, қызығушылық таныттым. Осы мақсатпен 2004 жылы елге келіп, дарқан даланың қасиетін зерделеп, түрлі шөптерді зерттей бастадым. Осы уақытқа дейін қазақ емшілігі туралы басы бүтін жинақталған кітап жоқ екен. Сол олқылықтың орнын толтырғым келді. Осы арқылы біздің ұлтта да дербес медицина болғанын дәлелдегім келді. Мәселен, бір ешкінің өзі 650 түрлі шөп жейді. Бұл дегеніңіз 650 түрлі ауруға ем деген сөз. Осының ара-жігін ашып, нақты пайдасын барынша дәлелдеуге тырыстым. Ал борсықтың майы – туберкулездің дәрісі. Осындай түрлі ем-домдар дерегі толықтай менің кітабымда келтірілген, – дейді Қайрат Айдарханұлы.
Кеш барысында өзге қонақтар да жылы лебіз білдіріп, келген қонақтардың барлығына үш томдық еңбек тарту етілді.