Түркістанды тамашалауға әлемнің 10-нан астам мемлекетінен журналистер келді. Тұран даласының тарихымен танысуды мақсат тұтып, тарихи топыраққа табан тіреген 20-ға жуық шетелдік БАҚ өкілі алдымен Арыстанбаб кесенесіне саяхат жасады. Арыстанбаб кесенесіндегі көне жәдігердің архитектуралық ерекшелігі мен тарихи мән-маңызы журналистердің қызығушылығын оятып, таң-тамаша етті.
Шетелдік меймандар мұнан кейін «Отырар» мемлекеттік археологиялық қорық-музейі мен көне Отырар қалашығын аралап, орталық қорындағы тарихи жәдігерлермен танысты. Экскурсиядан соң шетелдік қонақтар арнайы жайылған дастарқандағы ұлттық тағамдардан дәм татты.
Журналистер аялдаған келесі орын – Түркістандағы Қожа Ахмет Ясауи кесенесі болды. Түркі әлемінің рухани астанасы саналатын Түркістан шаһарының бай тарихымен танысқан баспасөз-турының қатысушылары, Әзірет Сұлтан мемлекеттік тарихи-мәдени мұражай-қорығын да аралады.
Айта кетейік, Елбасының «Рухани жаңғыру» бағдарламасының «Жаһандағы заманауи қазақстандық мәдениет» жобасын халықаралық деңгейде ілгерілету шеңберінде өткен «мәдени» баспасөз-турын Қазақстан Республикасы Сыртқы істер министрлігі мен Түркістан облысы әкімдігі ұйымдастырды. Еліміздің сыртқы саясатын және бейбітшілік пен тату көршілік саясатын белсенді жүргізу мақсатында Сыртқы істер министрлігінің ұйытқы болуымен еліміздің әр аймағында шетелдік тілшілердің баспасөз-турлары тұрақты түрде өткізіледі.
«Жаһандық әлемдегі қазіргі қазақстандық мәдениет» жобасы шеңберінде өтіп жатқан баспасөз туры туризмді дамытуға және жалпы Қазақстанның дамып келе жатқан мемлекет ретіндегі оң имиджін қалыптастыруға атсалысары анық.
Түркістан облысы