Түркістанда Президент Қасым-Жомарт Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауын іске асыруға арналған жиын өтті. Алқалы жиында облыс әкімі Өмірзақ Шөкеев Жолдауда айқындалған бағыттарға тоқталып, нақты тапсырмалар берді. Сондай-ақ жиын барысында белгілі болғандай, Nur Оtan партиясының облыстық филиалы «Халық үніне құлақ асатын мемлекет» тұжырымдамасын жүзеге асыруды қолға алмақ.
Облыстағы барлық сала өкілі мен жауапты мекемелердің басшылары төрт көзі түгел жиналған актив жиынында сөз алған Өмірзақ Естайұлы Президент Жолдауында айқындалған бағыттар еліміздің экономикалық өсімін жеделдетіп, халықтың әл-ауқатын жақсартуда маңызды рөл атқаратынына тоқталды. Облыс әкімі Өмірзақ Шөкеев сондай-ақ Жолдаудан туындайтын барлық тапсырма мен міндеттерді және көтерілген мәселелерді нақты әрі уақтылы орындау керегін айта келе: «Көптеген арыз-шағымды оңтайлы шешуде «Азаматтар өтініштерін бақылау» бөлімін құруды тапсырамын. Аталған бөлім барлық деңгейдегі арыз-шағымдардың мерзімінде жауап берілуіне бақылау жасайды. Халықпен байланысты нығайтуда қоғамдық бақылау және партия белсенділері мен шенеуніктерді бағалау тетігін ұйымдастыра білуіміз керек», – деді.
Жиын барысында белгілі болғаны, Түркістан облысында ауыл шаруашылығы, жеңіл өнеркәсіп түрлері кеңінен дамыған. Экспорттық потенциал өте жоғары. Аталған нысандардың өнімдері Kazakh Invest, Kazakh Tourizm мекемелері ұйымдастыратын халықаралық көрмелерге тұрақты қатысуын облыс басшысы тиісті сала басшыларына жүктеді.
Сонымен қатар облыс әкімі жиында «Елбасы тапсырмасына сәйкес «Ауыл – ел бесігі» жобасы облыста қарқынды жүзеге асып жатқанына тоқталды.
«Биыл Түркістан облысында 7 елдімекеннің мәселесін шешуге 4 млрд теңге жұмсалды. Нәтижесінде, 112,8 шақырым жол төселіп, 7 білім, 1 спорт және 5 мәдениет нысандары жөндеуден өтетін болады. Жоба аясында 2020 жылға 15 елдімекенде 114 жобаны іске асыруға 4,8 млрд теңге бағыттау жоспарлануда», – деді Өмірзақ Шөкеев.
Сондай-ақ облыс әкімі облыстағы кезек күттірмейтін тағы бір мәселе – атаулы әлеуметтік көмек мәселесін атап өтті. Аталған бағдарламаны цифрландырып, атаулы көмек алушылар базасын жасақтауды тапсырды.
Актив отырысында мәслихат депутаттары, ардагерлер, зиялы қауым, қоғамдық ұйым төрағалары жарыс сөзге шығып, Жолдауда аталған міндеттерді айтып, пікірлерімен бөлісті.
Өмірзақ Естайұлы қала, аудан әкімдері мен қалалық құрылымдардың басшыларына тұрғындар арасында кең ауқымды ақпараттық-түсіндіру жұмыстарын жүргізуді жүктеп, өздеріне жүктелген міндеттерді уақытылы әрі сапалы орындауға тапсырма берді. Жолдауда атап көрсетілген мәселелерді негізге ала отырып, облыстың әлеуметтік-экономикалық дамуы мен саяси тұрақтылықты қамтамасыз етуге, облыс тұрғындарын Жолдауды қолдауға шақырды.
Актив отырысы барысында Өмірзақ Шөкеевтен соң сөз алған Nur Otan партиясы Түркістан облыстық филиалы төрағасының бірінші орынбасары Бейсен Тәжібаев жергілікті атқарушы органдардағы партия мүшелеріне мәселені жасырғаннан гөрі жедел шешкен тиімді екенін айтты.
«Бүгінде облыста әлеуметтік жағдайдың төмендігі, тұрғын үй және жұмысқа орналасу мәселелері өте өзекті. Партия филиалы бірінші кезекте осы бағыттағы проблемаларды жүйелі түрде шешу үшін жергілікті әкімдіктермен, тиісті басқармалармен жоспар түзіп, жүргізетін болады. Президенттің Жолдауда айтқан барлық елдің өтініш-тілектерін тиімді қарастыратын «Халық үніне құлақ асатын мемлекет» тұжырымдамасын іске асыру үшін екі бағытта жұмыс жүргіземіз», – деп атап өтті Бейсен Тәжібаев.
Айта кетейік, Түркістан облысы бойынша Президенттің Жолдауда айтқан халықтың өтініш-тілектерін тиімді қарастыратын тұжырымдаманы іске асыру екі бағытта жүргізілмек. Ең алдымен, партия филиалының Қоғамдық қабылдау кеңсесі Түркістан қаласындағы халық ең жиі шоғырланған Алматы арбатындағы ғимаратта Open space форматына көшсе, екіншіден барлық лауазым иелерінің қабылдауларын әлеуметтік желілерде тікелей эфир арқылы жүргізу қолға алынбақ.
Түркістан облысы