Латвия атынан сайланған еуродепутат Сандра Калниете Ресей билігінің бұл қылмысты ашуға дайын болмай отырғанын жеткізіп, Еуроодақ тарапынан халықаралық тергеу тобын құруды ұсынған. Еуродепутат бұл топты БҰҰ, Еуропа Кеңесі, ЕҚЫҰ қатысуымен құру керек деп есептейді.
Химиялық қаруды қолданғаны үшін Еуроодақ елдері әдетте қатаң санкция қолданады. Навальный ісіне байланысты бірқатар еуропалық саясаткерлер Ресейге қарсы санкцияларды қолға алуды ұсынып отыр. Сандра Калниете бұл қылмысты ұйымдастырушылар мен атқарушылардың есепшоттарын бұғаттап, ЕО-ға кіруге тыйым салу қажет дейді. 2018 жылы Брюссель химиялық қаруды қолданғандарға қарсы санкция механизмдерін бекіткен еді. Мәселен, 2019 жылы бұрынғы агент Сергей Скрипаль «Новичоктан» уланған кезде Еуроодақ Ресей бас штабының жоғары лауазымды төрт бірдей өкіліне қарсы санкция қолданған. Еуродепутаттың айтуынша, егер қылмысқа кінәлілер табылмаса, онда осы салаға жауапты ІІМ мен Федералды қауіпсіздік қызметінің басшыларына қарсы қатаң шаралар қолдану керек.
Бундестаг депутаты Норберт Ретгеннің Ресей экономикасы үшін аса маңызды «Солтүстік құбыр-2» жобасын тоқтатуды ұсынуы қоғамда қатты талқыланып жатыр. Өз кезегінде ол: «Біз Путин түсінетін тілде жауап беруіміз керек: бұл табиғи газ бен оның тасымалы» деп мәлімдеген. Германия канцлері Ангела Меркель Навальныйдың улануын газ құбырын тоқтатуымен байланыстыруға қарсы екенін аңғартты. Ал еуродепутат Сандра Калниете бұл газ құбыры Еуропаны Ресейге тәуелді етеді, ал Ресей саяси қысым үшін осындай экономикалық құралдарды пайдаланады деп қынжылады. Оның ойынша, газ үшін еуропалықтар төлейтін ақша Путин режимін тек күшейте түседі. Сол себептен бұл жобаны жалғастырудың еш маңызы жоқ.
Еуропарламент сарапшысы Хельмут Шольц Украинадағы жағдайға байланысты Ресейге қарсы бірқатар санкциялардың онсыз да қолға алынғанын еске салады. Яғни, қолда әсер ететін құралдар да көп емес.
Ресей сарапшылары Германия, Франция мен Британия химиялық қарудың қолданылғанын қатаң сынады, ал бұл үштіктің санкция қабылдауда даусы басым деп ескертеді. Есесіне, Еуроодақтан гөрі АҚШ-тың реакциясы жұмсақ болады деп үміттенеді. Американың 1991 жылы қабылданған Химиялық және биологиялық қаруды жою туралы заңына сәйкес, Солсбери ісінде Ресейге қарсы бірқатар санкциялар қабылданған еді. Өткен жылы Дональд Трамп әкімшілігі Ресейдің жиынтық қарызына қарсы шектеулер қолданды. Бірақ билік АҚШ-қа Ресей мұнайының импортын тоқтату мен «Аэрофлот» ұшақтарының елге қонуын шектеу сияқты ұсыныстарды қабылдамады. Сол себептен сарапшылар Ақ үйдің еуропалық санкциялардан кейін мәлімдеме жасап, «Еуропалық ұстанымды қолдай отырып, Америка тарапынан қосымша шектеулердің қажеті жоқтығын айтуы мүмкін» дейді.
Навальный ісіне қатысты тергеу амалдары әлі аяқталған жоқ. Бүгінде Ақ үй басшылығы әлеуметтік желілерде егер қылмыскерлер анықталса, жеке тұлғаларға қарсы санкциялар қолданылатынын ашық мәлімдеп отыр.
