Тағы бір жыл тарих қойнауына енгелі тұр. Әлем жұртшылығын әуре-сарсаңға түсірген жыл спортшылардың, спорт мамандары мен жанкүйерлердің есінде ерекше есте сақталары анық. Өйткені коронавирус індеті, карантин шектеулері өзге салалар секілді спортқа да қатты әсер етті. Көптеген жарыс орта жолдан үзілді. Тіпті, Олимпиада ойындарының өзі келесі жылға шегерілді. Соған қарамастан кейбір жарыс түрлері карантин талаптарын сақтай отырып, ұйымдастырылды. Пандемияның арасында, вирус бәсеңсіген тұста көрерменсіз өткен жарыстарда бақ сынаған, жақсы нәтиже көрсеткен саңлақтарымыз да жетерлік. Біз солардың бірқатарына тоқталып, 2020 жылы ел есінде қалған жарыстар мен жетістіктерді өзімізше түзіп көрдік.
ЖЫЛ ЖЕТІСТІКТЕРІ:
Боксшыларымыз ерледі
– 2020 жылдың басты жарыстарының бірі – бокстан Токио Олимпиадасына жолдаманы сарапқа салатын іріктеу турнирі болды. Карантиннің алдында Иорданияның Амман қаласында өткен әуесқой бокстан Олимпиадаға іріктеу турнирінде Қазақстанның ерлер құрамасы сәтті өнер көрсетті. Отандық былғары қолғап шеберлері мүмкін болған сегіз жолдаманың бәрін иеленді. Осылайша, Ғалымбек Кенжебаев бастаған боксшылар келер жылы Олимпиадаға толық құрамда баратын болды.Көп күттірген чемпиондық
– Алматылық «Қайрат» футбол клубы араға 16 жыл салып, ел чемпионы атанды. Соңғы рет олар 2004 жылы алтын жүлдегер атанған. Биылғы чемпионат пандемияға байланысты екі рет тоқтатылып, ақыр соңы бір локацияда, яғни Алматы қаласында өтті. Чемпионаттың бітуіне 3 тур қалғанда Алексей Шпилевский жаттықтыратын команда мерзімінен бұрын чемпиондыққа қол жеткізіп, «Астана» гегемониясына нүкте қойды.«Тур де Франс»-тағы керемет жеңіс
– Велоспорттан әйгілі «Тур де Франс» көпкүндігінің алтыншы кезеңінде «Астана» командасының өкілі, отандасымыз Алексей Луценко жеңіске жетті. «Тур де Франс» – велоспорттағы ең беделді дода саналады. Оның бір кезеңінің өзін кез келген спортшы жеңе бермейді. Қазақстан спортшыларының арасында Алексей Винокуровтан кейін осындай бақыт Алексей Луценкоға бұйырды.
16 жастағы Бекболаттың рекорды
– Ақпан айында ауыр атлетикадан Ташкенттегі жасөспірімдер арасындағы Азия чемпионатында 16 жастағы Бекболат Рахат әлемдік рекорд орнатты. Бекболат 102 келі салмақта сынға түсіп, жұлқа көтеруде 158 келіні оңай бағындырды. Серпе көтеруде 198 келіні төбесіне көтеріп, әлемдік рекордты жаңартты. Қос сайыстың нәтижесі – 356 келі. Ол сондай-ақ қараша айында Перудің Лима қаласында өткен онлайн-форматтағы әлем кубогында 319 (140+179) келімен топ жарып, үздік деп танылды. Ал ересектер арасындағы ел чемпионатында Артем Антроповқа (68 келі қалып қойды) ғана жол беріп, күміс жүлдегер атанды.
ЖЫЛ СӘТСІЗДІКТЕРІ
«Ертіс» клубының жабылуы
– Коронавирус инфекциясының кесірінен футболдан 5 дүркін ел чемпионы «Ертіс» клубы қаржылық дағдарысқа ұшырап, біріншілікті уақытынан бұрын аяқтады. Бүгінгі таңда облыста «Павлодар» атауымен жаңа клуб құрылуда. Клуб келер жылдан бастап Екінші лигада өнер көрсететін болды.Қазақстан футбол құрамасы
– Чехиялық маман Михал Билек баптаған Қазақстан ұлттық құрамасы Ұлттар лигасы турнирінде соңғы орын алды. Бұл сәтсіздіктен кейін Билек қызметінен босатылды.
Қазақстандық клубтардың еуромаусымдағы сәтсіздігі
– 2020 жыл қазақ футболы үшін соңғы жылдардағы ең сәтсіз жыл болды. Соңғы бірнеше жылда легионерлердің көмегімен болса да «Астана» еурокубок ойындарының топтық кезеңінде бақ сынап жүр еді. Биыл еліміздің 4 командасы да екінші іріктеу кезеңінен әрі аса алмады.Жеңілмеген боксшыларымыздың жеңілуі
– Кәсіпқой бокста Флойд Мейвезердің салып кеткен жолымен жүруге тырысқан Нұрсұлтан Жаңабаев (8-1, 5 KO), Мадияр Әшкеев (14-1, 7 KO), Әли Ахмедов (16-1, 12 KO), Виктор Коточигов (12-1, 5 KO) алғаш рет қарсыластарына жол берді.ЖЫЛ ҮМІТІ
Еленаның ерлігі
– Ресейден Қазақстанға қоныс аударған 21 жастағы теннисші Елена Рыбакина биылғы жаңа есімдердің бірі десек, қателеспейтін шығармыз. Теннисшіміз жыл басында керемет өнер көрсетіп, мамандардың оң бағасын алды. Рейтингте 17-орынға дейін көтерілді. Мысалы, 21 ақпанда Дубайдағы турнирдің жартылай финалында әлемнің үшінші ракеткасы Каролинка Плишкованы жеңді. Одан кейін финалда әлемнің екінші ракеткасы румыниялық Симоне Халеппен кездескен. Бірақ үш сеттің қорытындысы бойынша қарсыласына есе жіберді. Әйелдер теннис қауымдастығы (WTA) бұл матчты осы жылдың ең үздік ойыны деп таныды.
21 жастағы отандасымыз 5 бірдей WTA турнирінің (Шэньчжэн, Хобарт, Санкт-Петербор, Дубай, Страсбург) финалына шығып, 1-уінде (Хобарт) топ жарды. Жақсы өнер көрсетуінің арқасында қыздар рейтингісінде 17-орынға көтеріліп, қазақ тарихындағы рекордты (2012 жылы Ярослава Шведова 25-орынға дейін көтерілген) жаңартты. Сонымен қатар ол қаржылық жағдайын (1 млн $-дан астам) жақсарта алды.
ЖЫЛ ТРАНСФЕРІ
Бақтиер Зайнутдинов бабында
– Ұлттық құраманың белді ойыншысы Ресей чемпионатындағы ортаңқол командалардың бірі «Ростовтан» «ЦСКА» командасына ауысып, мәскеулік клуб сапында 20 кездесу өткізді. «Урал» клубына соққан голы айдың «ең үздік гол» ретінде бағаланса, «ЦСКА» командасына ауысуын Ресей чемпионатындағы «ең сәтті трансферлер» рейтингісінде атап көрсетті. 2020 жылды Қазақстан ұлттық құрамасының «ең қымбат футболшысы» (2 млн еуро) ретінде аяқтады.
ЖЫЛ ДЕБЮТІ
UFC-де үш жауынгеріміз бар
– Биыл алғаш рет төбелестен әлемдегі ең беделді Ultimate Fighting Championship (UFC) лигасында 3 отандасымыз Мария Агапова (1 жеңіс, 1 жеңіліс), Жалғас Жұмағұлов (1 жеңіліс), Шавкат Рахмонов (1 жеңіс) өнер көрсетті. Келер жылы бұл құрам тағы да бірнеше спортшымен толығуы мүмкін.Тұрсынбай Құлахмет кәсіпқой боксқа ауысты
– 2019 жылы әуесқой бокстан Ресейде өткен әлем чемпионатының қола жүлдегері Тұрсынбай Құлахмет кәсіпқой боксқа бет бұрып, небәрі 2-ші жекпе-жегінде (ағылшын боксшысы Маклей Макгоуэнді ұтты) WBC International тұжырымы бойынша 1-ші орта салмақтағы белбеуді иеленді.ЖЫЛ ӨКІНІШІ
Бауыржан Исламханның басындағы дау
– Футболдан Қазақстан ұлттық құрамасының капитаны, «Әл-Айн» (БАӘ) клубының ойыншысы допинг дауына ілігіп, АФК тәртіптік комиссиясының шешімімен футболдан екі жылға шеттетілді. Қазақстандық футболшы істі Лоззаннадағы сотқа жіберетінін айтты.ЖЫЛ САҒЫНЫШЫ
GGG-дің көптен күткен кездесуі
– Геннадий Головкин мен Камил Шеремета арасындағы жекпе-жек тек 8-ші мүмкіндігінде ғана жүзеге асты. Бұған дейін кәсіпқой бокста жеңіліп көрмеген польшалық боксшы шаршы алаңда отандасымызға еш қарсылық (4 нокдаун, 7 раундтан соң, жекпе-жекті жалғастырудан бас тартты) көрсете алмады.ЖЫЛ ӨЗГЕРІСІ
Кәсіби спортқа бөлінетін қаржы 2 есеге қысқарды
– Елімізде жыл сайын 98 кәсіби клубқа бөлінетін 55 млрд теңге 2 есеге азайып, келесі жылы 22,2 млрд теңге болмақ. Артық қаражат бұқаралық спортты дамытуға бағытталады.Абылайхан ЖҰМАШ