Tengrinews.kz-тің хабарлауынша, Президент Қасым-Жомарт Тоқаев баспанаға қол жеткізу үшін қосымша шаралар қабылдап, жылына 2 пайыз ипотекалық несиелеу бағдарламасының қатысушылар тізімін ұлғайтуға уәде берді.
Президент Тәуелсіздік қарсаңында өткен жиында 2019 жылы 4 мың аз қамтылған отбасы «Бақытты отбасы» бағдарламасы бойынша қоныстой тойлағанын айтты. Бұл бағдарлама бойынша қарыз жылына 2 пайыз төлеммен беріледі. Алғашқы жарна — 10 пайыз. Қарыз мерзімі — 20 жылға дейін.
«Әрине, бұл жеткіліксіз. Қазір тоқмейілситін уақыты емес. Баспана мәселесін түбегейлі өзгерту керек. Бұл мәселе біздің бақылауымызда болады. Баспанамен қамтамасыз ету — мемлекеттің әлеуметтік саясатының басты міндеті, сондықтан жақын арада қосымша шаралар қабылданады. Үкімет «Бақытты отбасы» бағдарламасының тәжірибесін кезектегі барлық адамға тарату мәселесін қарастырып жатыр», — деді Мемлекет басшысы.
Ол үкіметке 2020 жылы бұл бағдарламаны ұлғайтуды тапсырғанын айтты. «Басқаша айтқанда, халықты баспанамен қамтамасыз ету мәселесіне бірінші деңгейде көңіл бөлінеді. Бұл жұмыстың жемісі алыста емес деп ойлаймын», — деді Тоқаев.