Мәжілістің биылғы соңғы отырысы өтті. Палата төрағасы Нұрлан Нығматулин жылжабар жиында қалаулылар қызметінің қорытындысын шығарды. Келесі жылы депутаттарды ауқымды жұмыс күтіп тұрғанын ескертті. Жыл басында олар ауыл-аймаққа аттанбақ. Ал халық алдын ала құлағдар болуы үшін парламентшілердің кездесулері қашан және қайда өтетіні әлеуметтік желілерден күні бұрын хабарланатын болады.
Н.Нығматулиннің айтуынша, Мәжіліс депутаттары заң шығарушылық жұмыста Елбасы Н.Назарбаевтың стратегиялық бағдарының басымдықтарын және Мемлекет басшысы Қ.Тоқаевтың 2 қыркүйекте, осы 5-сессияның ашылуында қойған бірінші кезекті міндеттерін басшылыққа алыпты.
– Сессия басталғалы Мәжіліс 77 жаңа заң жобасын жұмысқа қабылдап алды. Оның 36-сы қаралды және мақұлданды. Бұл ретте депутаттар ең алдымен, барша қазақстандықтардың тұрмыс сапасын жақсартуға және халықтың әл-ауқатын арттыруға бағытталған заң жобаларына барынша мән берді. Ерекше атап өтер жайт, біз ел Президенті Қасым-Жомарт Тоқаевтың Жолдауын жүзеге асыруға арналған барлық заң жобасын дер кезінде мақұлдадық. Осының арқасында Мемлекет басшысының Қазақстан халқына Жолдауына заңнамалық қолдауды толығымен қамтамасыз еттік, – деді Нұрлан Зайроллаұлы.
Ол құпталған құжаттардың маңызына жеке тоқтала кетті. Атап айтқанда, бағыныштылары жемқорлық қылмыстарға қолын былғағаны үшін бірінші басшының да дербес жауапкершілік арқалап, жаза тартуы алғаш заң жүзінде бекітіліп отыр.
Шағын және орта бизнестің корпоративтік табыс салығынан түсетін түсімді жергілікті бюджетке тапсыруды қарастыратын заң жобасы ауыл-аймақты кәсіпкерлікті дамытуға ынталандырмақ. Сонымен қатар микро және шағын бизнес өкілдері 3 жыл мерзімге табыс салығын төлеуден босатылады.
– Президент тапсырмасына сәйкес, жыныстық зорлық, педофилия, есірткі тарату, адам саудасы, әйелдерге тұрмыстық зорлық-зомбылық жасау және адамға қарсы басқа да ауыр қылмыстар, сондай-ақ браконьерлік пен мал ұрлығы үшін жаза қатайтылды. Жалпы алғанда, Мәжілістегі депутаттық корпустың жұмысы осы сессияның алғашқы күнінен бастап аса қарқынды жүрді, қауырт әрі қанық болды. Бізді алда Елбасы мен Мемлекет басшысының тапсырмаларының орындалуын заңнамалық қамтамасыз етуге бағытталған бұдан да ауқымды жұмыс күтіп тұр! – деді Мәжіліс төрағасы.
Ол ұлттық заңнаманы жетілдіру және оның сапасын жақсарту бойынша депутаттар мен Үкіметтің бірлескен жұмысы ары қарай да толық ақпараттық жариялылық ауанында өтетініне сендірді. Әділін айта кету керек, Мәжілісте тіркелген журналистерге тегіс «аккредиттеу карточкасы» берілген. БАҚ өкілдері кіреберісте сол құжатты көрсетсе болды, жұмыс уақытының кез келген бөлігінде – таң азаннан кешке дейінгі аралықта палата ғимаратына және депутаттар кабинеттеріне еркін кіре алады. Мұндай қозғалыс еркіндігі тіпті дамыған елдер парламенттерінде де кездеспейтіні мәлім.
Бесінші сессия басталғалы, яғни қыркүйек айынан бері палата Министрлер кабинетінің биік лауазымды мүшелерін шақыра отырып, әртүрлі маңызды тақырыпта 7 «Үкімет сағатын» өткізіп үлгеріпті. Оның қорытындысында меморгандар қызметін жақсарту жөнінде ұсыныстар берілді, ұсыным-рекомендациялар түзілді. Мәжіліс депутаттары Үкіметке 100-ден аса депутаттық сауал жолдаған. Палата комитеттері 5 көшпелі отырыс және көптеген халықаралық конференция ұйымдастырды. Ең ірісі әрі өкілеттісі 2019 жылғы қыркүйекте елордада өткен Еуразия елдері парламенттері спикерлерінің 4-кеңесі болды.