2023 жылдың қаңтар айының аяғында жаңадан сайланған сенатор Гүлмира Кәрімова қайтыс болды. Бір айдан кейін қылмыстық іс қозғалып, бүгін, яғни 1 мамырда Астанада қылмыстық іс жабылғаны белгілі болды, – деп хабарлайды Zakon.kz.
Бұл жөнінде Астана қалалық Полиция департаменті бастығының орынбасары Қуаныш Орынбетов "Патриот" басылымына түсініктеме берді.
"Гүлмира Кәрімованың кенеттен қайтыс болуына қатысты сотқа дейінгі тергеп-тексеру жұмыстары жүргізілді. Бүгінгі таңда тергеу ҚР Қылмыстық-процестік кодексінің 35-бабы 1-бөлігі 2-тармағына сәйкес, қылмыстық құқықбұзушылық құрамы болмауына байланысты тоқтатылды. Осы істі қадағалаған прокурор бұл шешімді бекітті", – дейді Астана қалалық Полиция департаменті бастығының орынбасары Қуаныш Орынбетов.
ҚР Парламенті Сенатының жаңадан сайланған депутаты Гүлмира Кәрімова 2023 жылғы 27 қаңтарға қараған түні қайтыс болды. Ол 45 жаста еді. Алдын ала "анафилактикалық шок" деген диагноз қойылған еді, бірақ 28 қаңтарда Денсаулық сақтау министрлігі өлімге жедел миокард инфаркт себеп болғанын хабарлады. 25 ақпанда сенатордың өліміне қатысты қылмыстық іс қозғалды.