Бұл туралы Caravan.kz медиа порталы хабарлады.
Бағдарлама жүргізушісінің: “Тұрсынбек Қабатов сын көтеретін азамат па?” деген сауалына Бауыржан Ибрагимов: “Ол сын көтере алмайды-ау. Қабатовты актер емес дегенім, ол кәсіби актер емес деген сөз. Мысалы, мен архитектураны оқып, өнер менің хоббиім болса, мен өзімді ешқашан актермін деп айта алмас едім. Біз – дипломы бар кәсіби актерміз. Олар – КВН ойыншылары, анекдот айтатындар. Ол сахнаға шығады, өзінің тыңдарманы бар. Оған еш таласым жоқ. Бірақ ол актер емес. Біз образ жасайтын актерміз. Бізді соған оқытқан. Мен бір татардың образын жасау үшін бір сағат бұрын келіп грим жасаймын. Костюм, грим, сахнадағы партнермен жұмыс дегеніміз – образ. Мен 15-20 минутсыз сахнадан кетпеймін. Өйткені қойылымның басы бар, аяғы бар. Қазіргі жастарға ол ұнасын, ұнамасын мен өз рөлімді алып шығуым керек. Қабатовтың айтып жүрген әңгімелерін біз 1982 жылы театр институтына түсейін деп жүргенде айтып тастағанбыз”, – деп жауап берді.