Павлодар облыстық Полиция департаменті баспасөз қызметінің мәліметінше, ведомство екі немесе одан да көп адамның абайсызда қайтыс болуына әкеп соққан тау-кен немесе құрылыс жұмыстарын жүргізу кезінде қауіпсіздік қағидаларын бұзу фактісі бойынша Қылмыстық кодекстің 277-бабы 3-бөлігі бойынша сотқа дейінгі тергеуді бастады.
«Тәжірибелі тергеушілер қатарынан арнайы жедел тергеу тобы құрылды. Тергеу Ішкі істер министрлігінің ерекше бақылауында», – деп хабарлады облыстық Полиция департаменті бастығының орынбасары Рашад Өтеуов.
Естеріңізге сала кетсек, 4 қаңтар күні сағат 01:25 шамасында «Майқайыңалтын» АҚ аумағындағы технологиялық автожолда жұмыс істемейтін шахтаның кеңістігіне топырақ опырылып, оған автобус құлаған болатын. Онда «Майқайыңалтын» АҚ шахтасы алаңында түтін шыққаны туралы шақыруға шыққан Кәсіби әскерилендірілген апаттық-құтқару қызметтері Республикалық орталық штабы (КӘАҚҚ РОШ) Павлодар филиалының 4 қызметкері, яки 1 жүргізуші мен 3 құтқарушы болған. Соңғы мәлімет бойынша облыстық ТЖД құтқарушылары опырылған құмнан қаза тапқан екі адамның денесін тапты. Олар – 24 жастағы Сарқыт Берліқан және 53 жастағы Олег Тышкевич. Тағы екі адамды іздеу жалғасуда.
Оқиға орнында әлі де топырақ сырғып, жылжып жатыр. Тартылған құтқарушылардың қауіпсіздігі үшін ауыр инженерлік техниканы жұмылдыру мақсатында үйіндінің шеттерін мәжбүрлеп түсіру және жүретін жолдарды салу бойынша дайындық жұмыстары жүргізілуде. Оқиға орнына ТЖМ, КӘАҚҚ РОШ, ЖАО, «Майқайыңалтын» АҚ, полиция және жедел жәрдем бөлімшелерінен барлығы 132 адам және 29 техника жұмылдырылды.
Куәгерлердің айтуынша, 3 қаңтар күні алтын шахтасында жаппай кен жыныстарын жару жұмыстары жүргізілген. Ал түн ортасына таман алтын кенішіндегі кезекші шахта ішіндегі әлдебір шуды құлағы шалып, құтқарушыларға, яғни кәсіби әскерилендірілген апаттық-құтқару қызметтерінің республикалық орталық штабы Павлодар филиалының өкілдеріне хабарлаған. Шақырту келіп түскен бойда қызметтік автобусқа 3 құтқарушы келіп мінеді. Кеніштің жер астындағы шахталары «воронка» әдісімен ойылып, бірінің үстінен бірі салынып отырады. Әлгі жаппай жару жұмыстарының салдары болды ма екен, сол күні түнде шахта үстіндегі топырақ қабаттары төмен құлап, жер үстінде үлкен ойпат пайда болған. Алайда кеніш қызметкерлері оны қараңғыда байқамай қалған тәрізді. Кенішке апаратын жол сол аумақты басып өтеді. Шақыртуға бет алған автобус кенеттен пайда болған ойыққа тап болып, төмен құлаған.
Қаза тапқан және жоғалған құтқарушылардың отбасыларына «Майқайың-алтын» АҚ және КӘАҚҚ РОШ-тан әрбір отбасына 4,5 млн теңгеден астам мөлшерде материалдық көмек көрсетілетін болады. Сондай-ақ мемлекет тарапынан қаза тапқан жандардың отбасыларына асыраушысынан айырылу бойынша әлеуметтік төлемдер тағайындалады. Бұл туралы Павлодар облысының әкімі Асайын Байханов айтты. Оның айутынша, бүгінде «Майқайың-алтын» АҚ аумағында іздестіру-құтқару жұмыстары жүргізіліп жатыр.
«Оқиға орнында менімен бірге Төтенше жағдайлар вице-министрі және басқа да қызметкерлер бар. Құтқарушылар өте қауіпті жағдайда жұмыс істеп жатыр. Бүгін таңғы сағат 06:00-де Астана қаласы ТЖД кинологтар бригадасы келіп, бірден іздестіру жұмысына кірісті. Біз іздеу-құтқаруды жалғастырамыз. Қаза тапқандар мен жоғалып кеткен мамандардың отбасыларына көмек берілетін болады. Қаза тапқан 2 құтқарушының отбасына қайғырып көңіл айтамын. Марқұмдардың иманы саламат болсын», – деді өңір басшысы.
Нұрлан ОРАЗҒАЛИ
фото: egemen.kz