Еуроодақ елдері пестицидтерді пайдалануды екі есе қысқарту жоспарынан бас тартатынын Financial Times газеті хабарлады. Бұл саяси шешімді қабылдау себептерін Aikyn.kz халықаралық басылымға сілтеме жасап талдайды.
Фермерлер пестицид қолдануды шектеуге қарсы. Фото agro-online.com сайтынан алынды
Еуропалық фермерлердің наразылығы үкіметтерді қорқытып тастаған сияқты. Еуроодақ комиссиясының басшысы Урсула фон дер Ляйен пестицидтерді пайдалануды екі есе азайту жоспарын «қоғамды екіге бөлгенін» мойындады.
Брюссель пестицидтерді пайдалануды екі есе қысқарту жоспарынан бас тартпақшы, Еуроодақ үкіметтерін өздерінің талаптарын орындауға көндірген фермерлер тағы бір жеңілдік алғанымен, бұл экологиялық күн тәртібіне үлкен соққы болды.
Урсула фон дер Ляйеннің артқа шегінуі оның осы жазда өтетін сайлау алдында фермерлерді тыныштандыру үшін жасалған. Сондай-ақ сейсенбіде (6 ақпанда) комиссия 2040 жылға қарай парниктік газдар шығарындыларын 90%-ға қысқарту туралы жол картасынан ауыл шаруашылығы секторын алып тастады.
Фон дер Ляйен және Бельгия, Нидерланды премьер-министрлері фермерлермен кездесуде. Фото Getty Images сайтынан алынды. Авторы: Belga Mag/AFP
Фон дер Ляйеннің жасыл күн тәртібі оның 2019 жылы комиссия президенті сайлануындағы саяси манифестің маңызды бөлігі болған еді. Бірақ энергияға деген жоғары баға мен Ресейдің Украинаға қарсы соғысынан инфляцияның өсуі оны жүзеге асыруды қиындатып жіберді.
Енді Фон дер Ляйен ханымның Еуроодақтың атқарушы билігінің президенті болып екінші 5 жыл мерзімге сайлануы да күмәнді болып қалды.
Фон дер Ляйен Еуропарламентте сөйлеген сөзінде фермерлердің наразылығынан кейін бұл жоспардың мерзімін өзгертуді сұрайтынын айтты. Бұл хабарландырудан кейін Еуроодақтағы ең ірі пестицид өндіруші Bayer компаниясының акциялары 5%-ға өсті.
Француздық фермерлер Париждің ортасында. Фото Reuters агенттігінен алынды
Бұл шешім Еуроодақтың жасыл күн тәртібіндегі соңғы сәтсіздігі болды. Брюссель сонымен қатар 2040 жылға дейінгі климаттық мақсатқа арналған ұсынымдарында ауылшаруашылық шығарындылары бойынша нақты нұсқаулардан бас тартты.
Еуроодақтың климат жөніндегі комиссары Вопке Хукстра «бұл біздің өмірімізге қандай өзгерістер әкелетінін дұрыс талдап, оның адамдардың әмиянына қаншалықты әсер ететінін де ескеру» қажеттігін айтқан.
Фермерлердің демонстрациялары соңғы апталарда барған сайын жойқын сипатқа ие болды және Германия, Франция, Бельгия, Польша және Румынияны қоса алғанда, Еуропаның бірнеше елдеріне таралды. Сейсенбі күні испандық фермерлер бірнеше аймақта шерулер өткізді.
Еуропалық қоршаған орта бюросының ауыл шаруашылығы және климаттық саясат жөніндегі маманы Матье Малле комиссия фермерлерге «қысқамерзімді жеңілдіктер» бергенін, бұл жеңілдіктер «ұзақмерзімді азық-түлік қауіпсіздігіне әсер етіп, фермерлер мен ауыл шаруашылығына зиянын тигізетінін» мәлімдеген.
Париж және Брюссель сияқты қалаларда болған наразылықтарды басу үшін комиссия қоршаған ортаны қорғау бағдарламасының кейбір бөліктерін, соның ішінде жоспарланған жануарларды қорғау ережелерін жеңілдетуге және тыңайған жерлерді егістікке қалдыруға келісті.