Тәуелсіздігімізді алғаннан кейін Мемлекет басшысы атқарушы билікпен бірлесе отырып, еліміздің әл-ауқатын көтеруге тиісті басқарушы институттың тағы бір тармағы қажет деп санап, өңірлерде мәслихаттарды құру туралы шешім қабылдаған болатын. Міне, бүгін тарихи бастамаға 30 жыл толды. Осы уақытта еліміздің дамуы мен өркендеуі барысында талай еңселі істің басында болған жергілікті өкілді органдардың маңызы зор.
Мемлекет басшысы Қасым-Жомарт Тоқаев: «Депутат болу – биік мансап емес, бұл – зор жауапкершілік және маңызды міндет», – деп атап өтті. Ал Парламент Мәжілісінің Спикері, «AMANAT» партиясының Төрағасы Ерлан Қошанов: «Партиядан сайланған барлық деңгейдегі мәслихат депутаттарының алғашқы республикалық форумында «Халықтың сенімі бізге күш береді. Сол сенімнің арқасында, өткен сайлауда Мәжілісте де, мәслихаттарда да басым дауысқа ие болдық», – деген болатын.
Ел ішіндегі көптеген мәселенің түйіні тарқатылды
2023 жыл еліміздің саяси өмірінде елеулі оқиғалармен есте қалды. Мемлекет басшысы жариялаған конституциялық реформалардың жалғасы ретінде Парламент Мәжілісі мен барлық деңгейдегі мәслихат депутаттарының сайлауы өтті. Осынау саяси науқанда «AMANAT» партиясы халықтың жоғары бағасына ие болды. Партиялық тізім бойынша Парламент Мәжілісі депутаттарының сайлауына түскен 7 саяси партия ішінен «AMANAT» партиясы сайлаушылардың 53,90 пайыз дауысына ие болған еді. Түркістан облысынан партиямыз ұсынған 4 кандидат: Ерлан Абдиев, Қайрат Балабиев, Темір Қырықбаев, Ұласбек Сәдібеков Парламент Мәжілісінің депутаты болып сайланды. Сайлау науқанында «AMANAT» партиясы Түркістан облысы бойынша сайлаушылардың 56,9 пайыз дауысын жинады. Өңір бойынша барлық деңгейдегі мәслихат депутаттарының мандат саны 338 болса, соның 271 мандаты, яғни облыстық, аудандық, қалалық мәслихат депутаттарының 80,1 пайызы – «AMANAT» партиясының өкілдері.
Түркістан облыстық мәслихатында да жетекші партияның рөлі зор. Облыс бойынша мәслихаттарда 338 мандат болса, оның 272-ін «AMANAT» партиясынан сайланған депутаттар иеленген. Партия атынан сайланған депутаттардың 254-і фракция мүшелері, 18-і мәслихат төрағалары. Оның ішінде: 33-і облыстық, 221-і аудандық, қалалық мәслихаттардағы фракция мүшелері. Фракция мүшелерінің 117-і Саяси кеңес мүшелері, 143-і Бастауыш партия ұйымдарының төрағалары, 52-і Кеңестер мен партиялық бақылау комиссияларының төрағалары болып табылады.
Бүгінде Түркістан облыстық мәслихатындағы «AMANAT» партиясының фракциясына Алтынсары Үмбетәлиев жетекшілік етуде. Депутаттық корпус өкілдерінің жұмыс тиімділігі партия қабылдаған сайлауалды бағдарламаны іске асыру нәтижелерімен және сайлаушылар білдірген өтініштердің орындалуымен бағаланады.
Өткен жылдың соңында өңірде алғаш мәрте барлық деңгейдегі мәслихат депутаттарының форумы өткен болатын. Жиында Түркістан облысының әкімі Дархан Сатыбалды өзі қатысып, «AMANAT» жетекші партия ретінде халық сеніміне ие болған ұйым екенін баса айтты. Басты міндет – тұрғындардың әл-ауқатын жақсартуда депутаттар мен жергілікті атқарушы органдар үйлесімді жұмыс жүргізсе, өңірдің дамуы серпінді болатынын атап өтті.
Мағынасы терең, мазмұны ерек жиынға партия атынан қатысқан депутаттар 4 панельдік сессия бойынша облыс әкімінің орынбасарларына, салалық басқарма және департамент басшыларына сайлаушылар білдірген ұсыныстарды тікелей жеткізуге мүмкіндік алды. Форум барысында айтылған 102 ұсыныстың орындалуы партия филиалының тұрақты бақылауына алынып, облыс әкімдігінің салалық басқармаларымен бірлесе іске асырудың жолдары белгіленді.
Жол картасы тармақтарының орындалуы – фракция мүшелерінің бақылауында
Ал биылғы жылдың басынан бері фракциялардың 53 отырысы өтіп, 81 мәселе қаралды. Өткізілген отырыстарда тиісті мемлекеттік органдарға 97 ұсыныс жолданды. Отырыстарда облыс, қала және аудан әкімдері орынбасарларының, басқарма, бөлім және мекеме басшыларының есептері тыңдалды. Күн тәртіптерінде сайлауалды бағдарлама Жол картасының орындалуы, облыстағы су тасқынының алдын алу, «Қарызсыз қоғам» партиялық жобасының жүзеге асырылуы, «Салық, бюджет, су, құрылыс кодекстері» мен мемлекеттік сатып алу сияқты маңызды заң жобаларын талқылау және заң жобаларына ұсыныстар беру, Заңнамалық актілерді жетілдіру мен Фракция қызметіне қатысты мәселелер қаралды.
«Жол картада 5 жылда 542 ісшараның орындалуы жоспарланған. Түркістан облысындағы фракция мүшелерінің барлығы, Жол картасы тармақтарына жауапты болып бекітіліп, оның орындалуы фракция мүшелерінің тұрақты бақылауында», – дейді «AMANAT» партиясы Түркістан облыстық филиалының төрағасы, мәслихаттағы фракция жетекшісі Алтынсары Дүйсенбекұлы.
Фракция мүшелері Жол карта аясында, облыс көлемінде құрылысы жүргізіліп жатқан нысандарға барып, құрылыстың сапасына, құрылыс жұмыстарының кестесіне мониторинг жүргізіп, ол туралы ақпарат таратып келеді. Сондай-ақ қазіргі таңда фракция мүшелерінен құрылған уақытша комиссия мүшелері, облыстағы медициналық ұйымдардың жұмысына зерделеу жұмыстарын жүргізуде. Қорытындысы бойынша, облыстық партиялық бақылау комиссиясында, салалық басқарманың есебі тыңдалатын болады.
Сондай-ақ бекітілген Ережеге сәйкес, фракция мүшелері, 486 қабылдау өткізіп, 1 550 азаматтың мәселесін тыңдаған. Оның 851-і оң шешімін тапса, 669-ына заң аясында кеңес берілді. Бұған қоса, фракция мүшелері шалғай елді мекендерде 116 көшпелі қоғамдық қабылдаулар өткізіп, 681 адамды қабылдады. Оның 351-і оң шешімін тапса, 330-ына заң аясында кеңес берілді.
Бүгінге дейін сайлаушылардан келіп түскен мәслихат депутаттарының бақылауындағы 1 748 өтініштің 81 пайызы оң шешімін тапты, қалғандарының белгіленген мерзім ішінде жүзеге асырылуы тұрақты қадағалауға алынған. Партиямыздың депутаттары есепті кезеңде, жергілікті атқарушы органдарға 309 депутаттық сауал жолдады. Оның 112-і оң шешімін тапса, 131 сауалға заң аясында түсіндірме берілген. Қалған 66-ы орындалу үстінде.
Түркістандық фракцияластар да қоғамдық жұмыстарға белсенді қатысуда. Мемлекет басшысы Қасым-Жомарт Тоқаевтың бастамасымен басталған, «Таза Қазақстан» экологиялық акциясы аясында, өткізіліп жатқан сенбіліктердің бел ортасында жүр. Жалпы, фракция мүшелері партияның халыққа берген уәделерін орындау үшін белсенді жұмыс істеп жатқанын атап өткізгіміз келеді.
Назгүл НАЗАРБЕК,
Түркістан облысы