Футзал тарихында Аргентина – Қазақстан өз алдына 3 рет бәсекеге түсіпті. Бір жеңіс аргентиналықтардың еншісінде болса, бірі біздің жігіттерге тиесілі. Үшінші ойында екі жақ тең тарқасқан. Жарысқа сақадай сай келген Оңтүстік Америка жігіттері бірінші минуттан бастап допты өз иеліктерінде ұстады. Кака шәкірттері Португалиямен кездесуден кейін ойын стилін өзгертіп, көбірек қорғанысқа бекінген. Өзбекстанның «Хумо арена» атты стадионы 12 мың адамға лық толды. Көршілес өзбек ағайындардың біздің құрамаға барынша қолдау көрсетіп жатқаны қатты қуантты. Иә, әр бұрыштан көк байрағымыз көтеріліп, «Алға Қазақстан!» деп ұрандап жатқан жанкүйердің дауысын естігенде рухың тасып кетеді екен.
Екі құрама да ойынға тастүйін дайындықпен келіпті. Белгіленген уақыт 20 минутты көрсеткенімен, бірінші тайм 40 минутқа созылды. Қазақстан құрамасы допты алған сәттен бастап контршабуылға кірісті. Бас бапкердің жігіттерге айтқан тапсырмасының арқасында бірнеше қауіпті соққыны жасадық. Бірінші таймның өзінде біздің құрама қақпаға дәл соққы көрсеткішімен қарсыластан басым түсті. Таймның орта тұсында Арнольд Кнауб допқа таласу үстінде қарсыласты «шынтақпен бір ұрдың» деп төрешінің сары қағазын алды. Одан кейін 1 минут көлемінде Дәурен Тұрсағұлов та сары қағаздың құрбаны болды. Биылғы футзал ойындарының бір ерекшелігі – Var жүйесінің өте сәтті қолдануы болып отыр. Бұл төрешілердің жұмысын біраз жеңілдетіп, күдік пен күмәнді сейілтіп жатқаны сөзсіз. Бірінші таймның соңғы секундтарында Дугластың ғаламат соққысын қақпаның бағаны құтқарып қалды. Осылайша, екі құрама бірінші таймды 0:0 есебімен аяқтады.
Екінші тайм біз көздегендей болмады. Аргентиналықтардың бас бапкері Матиас Лукуикстің ойыны күрт өзгерді. Оның шәкірттері ойнау стилін бос кеңістікке төсеп, еркін ойнауға көшті. Біздің жігіттер де қапы қалар емес. Әр соққыға тосқауыл қойып, қарсыластың осал тұсын табуды көздеп бақты. Кескілескен шайқаста бір құраманың гол соғуы айқын дүние еді. Не біз соғамыз, не Аргентина соғады. Таймның 22-минутында Роса атты ойыншы ортадан алдап өтіп, қақпамыздың оң жақ бұрышына көп күткен голын соқты. Алда 18 минут бар. Кака шәкірттеріне есепті теңестіруге де, оны еселеуге де уақыт жеткілікті. Алайда 27-минутта біз күтпеген жағдай болды. Шыңғыс Есенамановты қарсылас қыспаққа алып, Игитаға пас берген сәтте доп қақпа бағанына тиіп, Клаудиноның дәл аяғына түсті. Есеп 2:0. Ешкімді кінәлауға хақымыз жоқ. Жігіттеріміз ойынды ары қарай ширата түсті. Испания қақпасын торуылдап кеткеннен кейін қақпашысы да саса бастады. Бірақ шабуылдаймыз деп қорғанысты да бақылап отыру керек. Сондай бір шабуылдардың кезінде аргентиналықтар қарсы шабуылға шығып тепкен добы Арнольдтің қолына тиеді. Төрешілер алғашында фолды көрмей, ойынды жалғастырған еді. Кейіннен пенальти белгіледі. Мүмкіндік мүлт кетпеді. Осылайша, таблодағы есеп 3:0-ге өзгерді. Кака енді басқа әдіске көшті. Қақпашыны алып тастап, оның орнына бесінші ойыншыны қосты. Қарсыласты толықтай қысымға алып, мойын бұруға мұрша бермедік. Осындай сәттерде өте абай болу керек. Өйткені доп қарсыластың аяғына түссе, бірден қақпаға көздейтін әдеті бар. Ол бірден голға ұласуы мүмкін. Айтқанымыз сол еді, сәтсіз пастың кесірінен алаңның ортасынан тебілген доп дәл қақпаға кірді. Кака ашуға булықты. Алаңға бесінші ойыншы рөлінде Игита шықты. Ойын біздің еншімізде болғанмен, есеп әлі өзгермей тұр. Кенет Тұрсағұлов өзіне келген пасты бірден соққыға ұластырып, Николас Сарментоның қақпасына гол соқты. Лық толы стадион бір сілкініп, жаңа бір үміт сыйлағандай болды. Қуанышымыз көпке созылмады. Қатарынан 2 гол өткізіп, жігіттеріміздің салы суға түсті. Келесі кезеңге жолдаманы Аргентина алды.
Матч аяқталғаннан кейін құрамамыздың бас бапкері Рикардо Кака жауапкершілікті өз мойнына алатынын айтты. «Бүгін өз деңгейімізден әлдеқайда төмен ойнадық. Ал Аргентина өте сауатты әрі жақсы өнер көрсетті. Барлық жауапкершілікті өз мойныма аламын. Бұл – құрама тарихындағы ең нашар ойындардың бірі. Команданың көшбасшысы ретінде мұны мойындаймын. Жанкүйерлеріміздің бүгінгі қолдауына лайық болмадық. Ары қарай жұмыс істеуді жалғастырамыз. Мұнымен өмір тоқтап қалмайды», – деді бас бапкер.
Қазақстан футзал ассоциациясының вице-президенті Нұрсұлтан Құрман өз Instagram парақшасында:
«Ұят емес. Иә, бұл ойыннан қазақ жанкүйері біраз дүние күтті. Бұл кейбір ойыншылардың армандаған ойындағы меже қойған әлем чемпионаты болды. Ең алдымен 6:1-ге тоқталайық. Бұл – футзал. Футзалда 6:1-ді «ойсырай жеңілді» деп айта алмайсың, өйткені сен 2 доп айырмасымен жеңіліп жатсаң, бесінші ойыншыны қосуыңа тура келеді. Ал ол жерде ешкім сақтандырылмаған, бірнеше гол жіберуің мүмкін. Сондықтан жігіттер барын салды. Бірінші таймды керемет ойнап берді, екінші таймда психология шешіп кетті. Тағы айта кетсем, біздің жолымыз Аргентинаға қарағанда ауырлау болды. Испаниямен бір шаршадық, одан кейін Португалиямен бүкіл эмоциямызды беріп тастадық. Ал Аргентинаның тобы да, жолы да кішігірім жеңілдеу болды.
Кака мырзаға алғысымыз шексіз. Ойыншыларға алғыстан басқа ештеңе айтпаймыз. Кереметтей жорық болды. Жорық осымен тоқтады. Бірақ алда әлі Еуропа біріншілігі бар. Біздің жастар өсіп келе жатыр, тәжірибе алып жатыр десек те болады.
Тағы бір айтатын дүние: құрметті ата-аналар, өздеріңіз көргендей, бізде қолжетімді спорт түрі – футзал. Балаларыңызды футзалға беріңіздер. Барынша қолдау білдіріңіздер. Бізде бұл спорттың бұқаралық сипаты бар. Енді осыны кәсіби деңгейде арттыру керек. Ол сіз бен біздің, ата-ана мен баланың арқасы деп ойлаймыз. Ары қарай дайын материал болған кезде Какаға да оңай болары сөзсіз», – деп жазды.
Бұл додада өте әсерлі ойындарға куә болдық. Әр ойыншы алаңға шыққаннан бастап маңдай терін төкті. Мұнымен берілмейміз, мойымаймыз. Ұлттық құраманың жейдесінде 100-матчын өткізген Игита да алдағы Еуропа біріншілігінде ұлттық құрама сапында ойнайтынын хабарлады. Жігіттерімізден жаңа серпіліс күтеміз.
Әсет ҚАЛИ