«Бұл спорттық іс-шара, ең алдымен, халық арасында салауатты өмір салтын дамытуға, сондай-ақ нашақорлыққа қарсы күреске бағытталған», – деді Сарыарқа ауданы әкімдігінің қызметкері Дамир Хисматуллин.
Марафон «Көктал» саябағынан басталып, Бейбарыс Сұлтан көшесінде жалғасты. Жарыста кейбір қатысушылар Marvel комикс кейіпкерлерінің жарқын костюмдерімен таңғалдырды. Мысалы, Өрмекші адам және Бэтмен кейіпкерлерінің костюмдерін киген қатысушылар жарыстың қызығын келтірді. Жарысқа қатысқан спортсүйер қауым бірнеше санатта бақ сынасты. Балалар арасында 14 жасқа дейінгі ұлдар мен қыздар, ересектер арасында 18 бен 49 жас аралығындағы ерлер мен әйелдер және 50 жастан асқан тұрғындар қатысты.
14 жасқа дейінгі ұлдар үшін қашықтық – 2 шақырым, ал қыздар үшін – 1 шақырым. Қалған санаттағы қатысушылар бірдей қашықтықты 5 шақырым жүгірді.
«Мен жарыстарға Астанада ғана қатыспаймын. Марафон өте жақсы өтті, қатысқаныма қуаныштымын. Мен үшін әрқашан физикалық жағдайымды бағалау маңызды және осындай іс-шарамен спорттағы нәтижем жақсарады», – деді марафонға қатысушы Данияр Ахтанов.
Соңында балалар мен ересектер арасындағы марафонға қатысушыларды марапаттау рәсімі өтті. Жарыстың жеңімпаздары мен жүлдегерлері алғысхат пен медальдарға, сондай-ақ бағалы сыйлықтарға ие болды.