Тұңғыш Президент Кеңсесінің қызметкерлері бір күндік жалақысын коронавирусқа қарсы күресуге аударды, - деп хабарлады elbasy.kz.
Вирус пандемиясына байланысты жағдай барлық қазақстандықтарды біріктірді. Қазақстан Республикасы Тұңғыш Президенті - Елбасы Кеңсесінің қызметкерлері коронавирус инфекциясына қарсы күресу үшін Нұр-Сұлтан қаласы әкімдігіне өздерінің бір күндік жалақыларын аударды.
Еске сала кетейік, бұған дейін коронавирустың қаупіне байланысты 19 наурызда сағат 00.00-ден бастап Алматы мен Нұр-Сұлтан қалалары карантинге жабылатынын хабарлаған болатынбыз. Соңғы мәлімет бойынша, Қазақстанда 36 адам коронавирус жұқтырған.
